Алатай асирдин 30-40-йисара СтIал Сулейманан (гьа йисара — Кьасумхуьруьн) райондиз Урусатдай хейлин жегьил пешекарар атанай, абуру хуьрера педагогвилин, здравоохраненидин ва жуьреба-жуьре маса хилера кIвалахнай.
Дагъвияр савадлу, сагълам хьуник еке пай кутунай. Гьа пешекаррикай — урус ва маса халкьарин векилрикай кхьенвай “Незабываемые имена” тIвар алай ктаб и мукьвара “Новый Кавказ” издательский дестеди кIелдайбурув агакьарнава. Ктаб халкьдин кьегьал хва Имам Яралиеван мергьяматлувилин “Умуд” фондунин такьатрихъ гьазурна, чапдай акъудна. “Незабываемые имена” проектдин куратор Дагъустандин халкьдин шаир, райондин культурадин отделдин начальник Майрудин Бабаханов, ктаб гьазурайди машгьур журналист Алибег Омаров я.
Урусатдай Дагъустандиз жегьил пешекарар атуникай, абуру районда образование, здравоохранение, промышленность, хуьруьн майишат, культура вилик тухуник кутур еке паюникай суьгьбетзава. Хейлин мисалар гъанва, хъсан пешекаррин тIварар кьунва.
ЦIийи ктабдин эхирда алатай асирдин 30-40-йисара Кьасумхуьруьн райвоенкоматда учетда аваз хьайи урус халкьдин ва маса миллетрин векилар тир саки 500 касдин, абур дидедиз хьайи чкайрин тIварар кьунва.
Хазран Кьасумов
