И йикъара Дагъустандин культурадин министерствода жегьилрин арада меденият машгьурун патал “Пушкинан карта” тIвар ганвай Вирироссиядин программадиз талукьарнавай совещание кьиле фена. Идакай “Лезги газетдиз” министерстводин пресс-къуллугъди хабар гана. Мярекатда Дагъустандин культурадин министр З. Бутаевади, “Почта Банк” ПАО-дин республикадин “Дагъустан” центрадин управляющий Ш. Мегьамедова, РД-дин образованидин ва илимдин министрдин сад лагьай заместитель М. Абидова, РД-дин культурадин министрдин заместитель-статс-секретарь М. Гьажиева, РД-дин информациядин ва печатдин министрдин СМИ-рихъ галаз кIвалахдай управленидин начальник С. Къурбановади ва масабуру иштиракна.
Малум тирвал, алай йисан 1-сентябрдилай Вирироссияда кьилиз акъудунив эгечIнавай программадин макьсад акьалтзавай несилдин меденисузвилихъ ва и рекьяй лазим чирвилер тахьунихъ галаз женг чIугун я. Гьукуматди картадиз чара авунвай пулдин такьатрихъ жегьилриз жуьреба-жуьре мярекатра иштиракдай мумкинвал жезва. Ам 14-далай 22 йисалди яшда авай жегьилриз гузва. Виртуальный карта “Госкъуллугъар” порталда ачухиз жеда. Пластикадин карта ачухиз кIандай ксар “Почта банкдин” отделенидиз фин лазим я. И картада 3 агъзур (къведай йисуз адан кьадар — 5 агъзур) манат жеда.
Совещанидал кIватI хьанвайбуру къейд авурвал, и проектдихъ жегьилар патал еке важиблувал ава, гьаниз килигна адакай чи республикадин гзаф жегьилри менфят къачун патал гъавурдик кутунин кIвалахни вини дережада аваз тешкилун лазим я. ИкI, икьрар хьайивал, РД-дин культурадин, гьакIни рекъемрин (цифровой) рекьяй вилик тухудай министерствойри республикадин мектебра, ссузра ва вузра “Пушкинан картадин” гьакъиндай гъавурдик кутунин кIвалах тухуда.
Къейд авун лазим я хьи, чи республикадин медениятдин рекьяй 5 идаради и программада иштиракзава. Абурун арада ава: М.Горькийдин тIварунихъ галай Урусрин драмтеатр, Дагъустандин операдин ва балетдин театр, Аваррин музыкадинни драмадин Гь.ЦIадасадин тIварунихъ галай театр, Лакрин музыкадинни драмадин Э.Капиеван тIварунихъ галай театр ва Дагъустан Республикадин А.Тахо-Годидин тIварунихъ галай Милли музей.
«Лезги газет»
