Алатай гьафтеда Махачкъалада, Дагъустандин информациядин ва печатдин министерстводин конференцийрин залда, аялрин ва 14-17 йисара авай жаванрин карчивилин ва финансрин рекьяй савадлувал хкажун патал олимпиададиз талукь яз адан тешкилатчийри пресс-конференция кьиле тухвана. Олимпиада кьиле тухудай шартIарикай ва къайдадикай журналистриз “Фабрика предпринимательства” проектдин региондин векил Мурад Жалиева ва ЦПП-дин (центр поддержки предпринимательства) директордин заместитель Бахрам Мирзоева суьгьбетна.
Олимпиада са шумуд паюникай ибарат я. Сад лагьай пай онлайн къайдада, яни карчивилиз талукь темадай тестар ва задачаяр гьялуникай ибарат я. Кьвед лагьай паюна олимпиададин иштиракчийривай, карчивилин кIвалах кьилиз акъуддайла, лазим къвезвай юридический ва финансрин рекьяй чирвилер ахтармишда, абуру кьатIунзавай, фикирзавай саягъ чирда ва икI мад.
— ЦIи Олимпиада 1-сентябрдилай 20-сентябрдалди кьиле фида. Алатай йисара ва цIини, гьелелиг кьиле тухванвай лекцийрай малум жезвайвал, аялри ва жаванри карчивилиз екез итиж ийизва, идахъ галаз сад хьиз, иштиракчийрин кьадарни къвердавай артух жезва. Олимпиадада Дагъустандин образованидин саки вири идарайра кIелзавай аялри иштиракзава. Адаз талукь тир вири малуматар РД-дин образованидин ва илимдин министерстводин сайтдай жагъуриз жеда, — алава хъувуна Мурад Жалиева.
Вичин нубатдай Бахрам Мирзоева Олимпиададин макьсаддикай ва адан тешкилатчийрикай суьгьбетна:
— Дагъустандин мулкарал “ГъвечIи ва юкьван карчивал ва и хиле зегьмет чIугвазвайбуруз куьмек гун” милли проектдин сергьятра аваз кьилиз акъудзавай и серенжемдин макьсад республикадин акьалтзавай несилдиз бизнес, карчивал кьиле тухудай лазим чирвилер аялзамаз гуникай (лекцияр ва семинарар кьиле тухуналди), абурун чирвилер артухаруникай ибарат я. ЦIинин Олимпиададин тешкилатчияр, “Фабрика предпринимательства” проектдилай гъейри, РД-дин ЦПП ва Дагъустандин образованидин ва илимдин министерство я.
Мугьманрин гафарай мадни малум хьайивал, Олимпиададин суалар четинбур туш. Кьилин фикир иштиракчийри бизнес-план туькIуьрнавай тегьердиз, адан процессрин гъавурда аваз хьунин дережа ахтармишуниз гузва. Алатай йисара Олимпиададин финалдиз 20 проект акъатнай. Гъалибчийриз къиметлу пишкешар ва пулдин куьмекар гана. “Фабрика предпринимательства” проектди республикада карчивилел машгъул жез кIанзавай чIехи ксаризни куьмекар гузва. Асул гьисабдай ам, ИП (индивидуальное предпринимательство) ачухдайла, документар дуьз туькIуьруниз талукьди я.
Рагнеда Рамалданова
