3-сентябрдиз, терроризмдихъ галаз женг чIугвадай йикъан сергьятра аваз, Кьурагьа, ОМОН-дин капитан Закир Куругълиевич Султанован экуь къаматдиз бахшна, мини-футболдай турнир кьиле фена. Идакай райондин сайтда хабар ганва. Турнирда Кьиблепатан Дагъустандин командайри иштиракна. Акъажунрин макьсад Закир Султанован къамат эбеди яз рикIера хуьн, спорт ва сагълам уьмуьр таблигьат авун, Кьиблепатан Дагъустанда мини-футбол машгьурун, спортсменрин устадвал хкажун, акьалтзавай несил ватанпересвилин руьгьдаллаз тербияламишун тир.
Судьяйрин коллегиядин къарардалди турнирда иштиракзавай командаяр кьве патал пайна. ИкI, сад лагьай дестедик “Кьурагь”, “Агъа СтIал”, “Белиж” ва “Хив”, кьвед лагьай дестедикни “Усугъчай”, “Куьре”, “Ахцегь” ва “Мегьарамдхуьр” командаяр акатна. Вири санлай и юкъуз командайрин арада 16 къугъун кьиле фена. КIвенкIвечи чкадиз Мегьарамдхуьруьн райондин дуствилин команда лайихлу хьана. “Белиж” ва “Хив” командайри, талукь тирвал, 2 ва 3-чкаяр кьуна.
Мадни Ферзиллаев Гьажи (Мегьарамдхуьр), Саркаров Жамал (Усугъчай), Агъамирзоев Абдулгьамид (Хив), Селимов Керим (Белиж) турнирда виридалайни хъсандиз къугъвайбур яз гьисабна.
Къейд авун лазим я хьи, вич алай вахтунда Ростов шегьерда яшамиш жезвай ва гьар йисуз и турнир кьиле тухун патал пулдин такьатар чара ийизвай карчи Таибов Аслан Таибович “Кьурагь район” МР-дин кьил Замир Азизован патай чухсагъулдин Чарчиз лайихлу хьана.
Терроризмдихъ галаз женг чIугвадай йикъан сергьятра аваз Кьурагь райондин администрациядин физический культурадинни спортдин ва жегьилрин крарин рекьяй отделди райондин диндин идарадихъ галаз санал “Кьурагь-Дугун-Кьурагь” маршрутдай велопробег тешкилна. Сагълам уьмуьр тухузвай хейлин ксари и серенжемда иштиракна. Абуруз виридаз “Терроризмдиз — ваъ!” гафар кхьенвай футболкаяр гана.
Турнирда ва велопробегда иштиракай ксарив шабагьар вахкуниз талукьарнавай мярекатда Кьурагь РОВД-дин начальник Султан Къарибовани иштиракна, ада гъалибчияр тебрикна ва абурун тIварцIихъ хуш келимаяр лагьана.
«Лезги газет»
