Лезги халкьдин яратмишдай интеллигенциядин векилрив и йикъара Дербентдай чIулав хабар агакьна: цIайлапан хьиз галукьай азардикди тIвар-ван авай писатель, драматург, тарихчи алим, публицист Фейруз Абумуслимович Беделов (Беделахтул) рагьметдиз фена.
Ф.А.Беделов 1949-йисан 22-мартдиз КцIар райондин ТIигьир хуьре дидедиз хьана. Ина юкьван школа, Бакуда Азербайжандин госуниверситетдин журналистикадин факультет акьалтIарна. Зегьметдин рехъ газетрин редакцийра кIвалахунилай гатIунна. Ада лезги, азербайжан, урус чIаларалди кхьизвай.
Фейруз Абумуслимовичакай 1990-йисалай Бакуда лезги чIалал акъатзавай аслу тушир “Самур” газетдин сад лагьай редактор хьана.
1994-йисалай ам Дербент шегьерда яшамиш жезвай. Ина жуьреба-жуьре институтра тарихдин муаллимвиле кIвалахна. Гьа са вахтунда Москвада тарихдин илимрин кандидатвилин дережани хвена.
Ф.Беделован яратмишунрин рехъ алатай асирдин 60-йисара Лезгистандикай кхьенвай макъалайрилай, очеркрилай ва фантастикадинни махарин тах квай гьикаяйрилай башламиш хьана. Лезги, азербайжан, урус чIаларал адан “Цирцам — тIвар квахьнавай жегьил”, “ТипIрен свас”, “Муьхце мехъер” ва маса эсерар чапдай акъатна.
1993-йисуз писателди кIелдайбурув лезги гьикаятда сифте яз мифологиядин жанрдин “Миф” тIвар алай роман агакьарна. И эсерди ам неинки Лезгистанда, гьакI адалай къецени гзаф чкайра машгьурна.
Драматург яз, Ф.Беделован “Филиал”, “Часпар”, “Аюхар”, “Яру квасани ЦIару кваса” къемедаяр машгьур я, абур чи театррин сегьнейрални атана.
2011-йисуз Москвада автордин гьикаятдинни драмадин эсеррикай ибарат “Яру стIалрин марф” ктаб акъатна.
Тарихчи яз, ада чи халкьдин лап къадим вахтарин яшайиш, культура, адетар, фольклор ахтармишна. Чи гъилера адан “Лезги халкьдин ва гьукуматдин тарих” (1998), “Лезгийрин мажуси дин” (2000), 3 ктабдикай ибарат “Лезгийрин гъуцарин дин” ктабар ама.
Алимдихъ, писателдихъ, публицистдихъ ва драматургдихъ кьилиз акъудиз агакь тавунвай гзаф ниятар авай. Амма ажал инсафсуз я.
Чна рагьметлудан хизанриз, мукьва-кьилийриз, ярар-дустариз башсагълугъвал гузва. Фейруз Абумуслимовичан экуь къамат чи рикIелай алатдач.
“Лезги газетдин” редакциядин коллектив
