Советрин девирда Дагъустандин саки гьар са хуьре клубар, медениятдин жуьреба-жуьре маканар кардик квай. Анра мукьвал-мукьвал суварриз, лишанлу вакъиайриз талукьарнавай мярекатар, гуьруьшар тешкилзавай, хуьрерин агьалийри азад вахтунда анра ял язавай. Гьайиф хьи, чи йикъара гзаф хуьрера ихьтин маканри кIвалахзамач. Садбур михьиз агал хьанва, бязи клубрин дараматар цIийикIа туьхкIуьр хъувунин игьтияж ава, пешекарар бес тежезвай чкаярни ава. Гьа са вахтунда кIвалах хъсандиз къайдадик кутунвай, масабуруз чешне яз къалуриз жедай клубарни авачиз туш. Ихьтинбурукай сад СтIал Сулейманан райондин Бутхуьре ава.
Са акьван екеди тушир и хуьр Шихидхуьруьн администрациядик акатзава. Чкадин агьалияр асул гьисабдай хуьруьн майишатдин крарал машгъул жезва. Мукьвара инин жемятдив шад хабарни агакьна: хуьре мектеб ва аялрин бахча эцигдайвал я. Райондин администрациядин пресс-къуллугъди хабар гузвайвал, проектдиз, санлай къачурла, 200 миллион манат пул акъатда. Мергьяматлу и кар гъиле кьунвайди чи халкьдин баркаллу руш Фируза Керимова я.
Бутхуьре медениятдин макан (культурно-досуговый центр, КДЦ) кардик кваз гзаф йисар я. Аниз Назират Мамедовна Ханбалаевади регьбервал гузва. ГъвечIи чIавалай халкьдин адетрал, милли манийрал рикI алаз чIехи хьанвай Н.Ханбалаевади вичин везифаяр намуслудаказ кьилиз акъудзава. Идан гьакъиндай адахъ кIвалахдин рекье хьанвай агалкьунри шагьидвалзава. Вирибурун тIварар кьун тавуртIани, са шумуд къейд тавуна жедач: “Шарвили” эпосдин сувариз талукьарнавай мярекатра иштиракунай СтIал Сулейманан райондин администрациядин патай Гьуьрметдин грамота, Дагъустандин медениятдин ва чIаларин йикъаз бахшнавай хъсан мярекат тешкилунай райондин культурадин управленидин патай Разивилин чар, Ватандин ЧIехи дяведа къачур Гъалибвилин гьуьрметдай махсус конкурс кьиле тухунай диплом ва масабур. И сиягь мадни давамариз жеда.
Н.Ханбалаевадиз фасагьатдиз хайи чIал чида, адахъ ширин сес ава, кьилинди — вичин пешедал рикI ала. Гьавиляй ада къуьн кутуна тешкилзавай вири мярекатар халкьдини хушдиз кьабулзава. Лагьана кIанда, Бутхуьруьн культурадин макандин директорди райондин медениятдин уьмуьрда активнидаказ иштиракзава. СтIал Сулейманан ватанда кьиле физвай медениятдин гьар са мярекатдик ада вичин пай кутазва.
Н.Ханбалаева, чешнелу пешекар хьиз, пуд веледдин къайгъудар диде, хтулрин кIани баде я. Вичин уьмуьрдин юлдаш Рагьим Жалалдинович Ханбалаевахъ галаз санал абуру хъсан хизан арадал гъанва. Абурун рухвайрикай сада — Шамил Ханбалаева Шихидхуьруьн администрациядиз регьбервал гузва. Руш Шапичедихъни хва Зелимханахъ туькIвей хизанар ава.
Чи мурадни Назират Мамедовнадихъ кIвалахдин рекье агалкьунар, хизанда бахт-берекат хьун я.
Агьмед Магьмудов
