Федеральный метлебдин “Кавказ” шегьре рекьяй Дербентдиз фидайла, Музаим хуьруьхъ элкъвезвай къекъуьндал къир цазвай техника акурла, чун гьаниз мукьва хьана.
Чкадал кьиле физвай кIвалахрал Дербент райондин ЖКХ-дин начальник Мансур Зейфединова гуьзчивал тухузвай. Адан гафаралди, шегьре рекьелай Музаим хуьруьн центрадихъ физвай рехъ цIийикIа туьхкIуьр хъийизва. Алай вахтунда ина къир цунин кIвалах худда гьатнава. Планда къалурнавай 4 километр рекьин са паюна къир цанва.
— Райондин мад гьи хуьрера рекьер цIийикIа туьхкIуьр хъийизва? — жузуна чна М.Зейфединовавай.
— Ихьтин кIвалахар исятда Араблинка хуьрени кьиле физва. Ана 2,5 километр рекье къир цана акьалтIарнава. Лагьана кIанда, марфар къвайила, рекьера гьатзавай ятар авахьун патал къерехрай махсус турбаяр кутунва. Идалай гъейри, цIийикIа туьхкIуьр хъувунвай рекье улакьар гьалзавайбур патал махсус лишанарни эцигда, — лугьузва Дербент райондин администрациядин ЖКХ-дин начальникди.
Къейд ийин хьи, Дагъустандин шегьерранни районра авай рекьер цIийикIа туьхкIуьр хъувунин программадин сергьятра аваз Араблинка хуьре Юрий Гагаринан тIварунихъ галай куьчедани ремонтрин кIвалахар кьиле физва. И куьчедани къир цадайвал я. Вири и крар “Дагестанавтодор” карханадал ихтибарнава.
Къагьриман Ибрагьимов
