Гьар йисуз 1-сентябрь чи уьлкведа Чирвилерин сувар яз кьиле тухузва. Дугъриданни, им чи акьалтзавай несил патал халис суварин югъ я. 1-сентябрдиз уьлкведа 18 миллиондив агакьна аялар школайриз фена. Гьа гьисабдай яз — 2 миллиондилай виниз бицIекар — 1-классдиз. Им пара шадвалдай кар я.
Малум тирвал, 1-сентябрдиз акьалтзавай несил патал школайрин цIийи дараматарни ишлемишиз вахкузва. И кардал гьалтайла, гъилевай йис Дагъларин уьлкве патал пара лишанлуди хьанва. Агъзурралди аялар патал школайрин цIийи дараматри чпин ракIарар ачухна. И шад вакъиадиз талукь яз Владивостокда яшайишдин цIийи объектар ачухзавай мярекатра иштиракзавай Россиядин Федерациядин Президент Владимир Путина видеоалакъадин къайдада дагъустанвийриз Чирвилерин сувар тебрикна. Ада лагьана:
“1-сентябрдиз, адет яз, уьлкведа пара шад, рикIиз хуш вакъиаяр кьиле физва. Абурукай садни Дагъустанда яшайишдин 37 дарамат ишлемишиз вахкун я. Абурукай 36 дарамат военный эцигунардайбуру хкажна”. В.Путина къейд авурвал, цIийи школаяр, аялрин бахчаяр, яслияр алай аямдин мебелдалди, техникадалди, къулай ва гегьенш кIвалералди, къугъвадай, спортдин майданралди таъминарзава. Президентди алава хъувурвал, республикада йисан эхирдалди мадни яшайишдин са шумуд дарамат ишлемишиз вахкуда.
“Чизва, оборонадин министерстводи чаз пара кIани Дагъустанда яшайишдин 37 объект эцигзава, абурукай 27 йисан эхирдалди ишлемишиз вахкуда. Образованидин цIийи идарайри ва акьалтзавай несил патал тешкилзавай къулай шартIари Дагъустан яшайишдин рекьяй вилик финиз екез куьмекда”, — лагьана государстводин Кьили.
Россиядин оборонадин министр Сергей Шойгуди вичин рахунра къейд авурвал, 700 аял гьакьдай 2 школа, 1210 чка авай 7 бахча ва 5160 аял патал эцигзавай 27 ясли алай аямдин мебелдалди, спортдин ва къугъвадай майданралди тадаракламишда. Чкадин промышленностдин карханаяр вилик фин патални им хъсан мумкинвал я. ГьикI лагьайтIа, эцигунардай материалрин 80 процент абуру гьазурзава.
Дагъустан Республикадин Кьилин везифаяр вахтуналди тамамарзавай Сергей Меликова малумарна хьи, военныйри эцигзавай яшайишдин объектрилай гъейри, республикада йисан эхирдалди школайрин ва аялрин бахчайрин 24 дарамат ишлемишиз вахкуда.
— Къе республикадин 19 шегьерда ва хуьре образованидин 20 дарамат ачухзава, — лагьана С.Меликова. — Абурун чIехи пай оборонадин министерстводин къуватралди эцигнава. Йисан эхирдалди Дагъларин уьлкведа яшайишдин мад 51 объект ачухда. Абурукайни 27 — военныйрин куьмек галаз.
ТIугъвалдиз, эцигунардай материалрин къиметар хкаж хьуниз, дагълух хуьрерин четин шартIаризни килиг тавуна, республикадин эцигунардайбуру ва военныйри чпин везифаяр лайихлувилелди кьилиз акъудзава. Инанмиш я хьи, цIийиз ишлемишиз вахканвай ва вири къулай шартIар авай дараматри муаллимриз аялриз дерин чирвилер ва хъсан тербия гунин карда куьмекда, акьалтзавай несилдикай Россиядин лайихлу агьалияр жедай мумкинвилер яратмишда.
1-сентябрдиз Сергей Меликова Эндирей хуьре школадин цIийи дарамат ачухуниз талукьарнавай мярекатда иштиракна.
— Заз аквазва, къе Эндирей хуьруьн агьалийри чпин аялар патал вири жуьредин къулай шартIар авай гуьзел дарамат ишлемишиз вахкунал шадвалзава. Школадихъ неинки классар, кабинетар гала, ина гьакI спортдин 6 майдан ва талукь маса мумкинвилерни ава. Къе школада тешкилнавай линейкада 1 ва 11-классрин аялри иштиракзава. 11-классдиз 6 ученик, 1- классдиз 56 ученик атанва. И рекъемри чаз а кардикай лугьузва хьи, Дагъустандин районра ва хуьрера цIийи школаяр эцигунихъ еке метлеб ава. Гьавиляй чна инлай кьулухъни хуьрерин школаяр ремонт авуниз, лазим чкайра школайрин цIийи дараматар эцигуниз еке фикир гуда, — лагьана республикадин Кьили.
С.Меликова къейд авурвал, Эндирей хуьруьн школа эцигун патал военныйри чкадин агьалийрикайни 156 кас кIвалахдал желбна.
Дербент райондин Араблинское хуьре аялрин “Золушка” бахча ачухуниз талукьарнавай мярекатдал анин заведующий Раиф Саидова РФ-дин Президент Владимир Путиназ аялрин цIийи бахчадикай шадвилелди ихтилатна. Адаз жаваб яз, Владимир Путина къейдна: “Аялрин бахчадин заведующий кардин гъавурда авай, уьмуьр акунвай итим хьунал за шадвалзава. Аялрихъ галаз кIвалахзавай идарада итим хьун гьикьван хъсан кар я. За фикирзавайвал, образованидин идарайра кIвалахзавай итимрин кьадар артухарун пара важиблу я”.
1-сентябрдиз Дагъустанда образованидин цIийи 20 дарамат ачухна. Абурук Араблинскдин, Мегьарамдхуьруьн, Дербентдин аялрин бахчаярни акатзава.
«Лезги газет»
