“Лезги газетдин” алай йисан 30-нумрадиз акъатай “Бубайрин ватандал чан хкизва” макъала кIелайла, зун гзаф шад хьана. Ана кхьенвайвал, Ухулрин хуьрел чан хкиз кIанзавай ксар майдандиз экъечIнава. Аферин чпиз!

Ухул (Угул, Ыгил, Йугул) зи сур бубайрин хуьр я. 1978-йисан 31-августдиз зун балкIандаллаз Шалбуз дагъдин кIане авай, машиндин рехъ авачир хуьруьз (ам чIулав рагак ккIанвай 10-15 мертебадин зурба дараматдиз ухшар я) хкаж хьана. Заз жуван миресар жагъуриз кIанзавай. Хуьре зун мектебдин директор Къелем Ибрагьимова къаршиламишна. Муаллимарни кIватI хьана. Ахцегьай вертолет атана, хуьруьн къаншарда авай майдандал мектебдиз герек затIар — доскаяр, партаяр, учебникар, дафтарар, мелерни кваз авудна. Жемятди мел авуна, абур са геренда са верс винелди дашмиш хъувуна. Къелем муал­лим­ди зи гьуьрметдай эдебиятдин мярекатни тешкилна.

Пакамахъ, 1-сентябрдиз, хуьр пионеррин зуьрнединни далдамдин ванери ахварай авудна. Мектебдин гьаят дамахарнавай муаллимрай (заз накь акур муаллимар чир хъжезмач: виридал чIулав костюмар, лацу перемар ала, гарданра галстукар ава) ацIана.

Гьаким  Къурбан,

писатель, алим