Духтурри, пешекарри коронавирусдин вилик пад кьун патал агьалийриз и тIегъуьндиз акси рапар ягъуниз эвер гузва. Уьлкведин са шумуд регионда, гьа жергедай яз Дагъустандани, Роспотребнадзорди яшайишдин са жерге хилерин къуллугъчияр коронавирусдиз акси рапар ягъуниз мажбурнава. И месэладиз талукь къарар Управленидин сайтда чапнава. Сагълам яз, амма рапар ягъуникай кьил къакъудзавайбур вахтуналди кIвалахдикай магьрум хьунни мумкин я.
Эхиримжи варцара къанун-къайда хуьдай органрин къуллугъчийри уьлкведин жуьреба-жуьре регионра агьалийриз коронавирусдиз акси раб янавайди тестикьарзавай къалп сертификатар ганвай дуьшуьшар винел акъуднава. И сиягьдик чи республикани акатнава. Дагъустандин МВД-дин пресс-къуллугъди хабар гузвайвал, мукьвара полициядин къуллугъчийри коронавирусдиз акси рапар янавайди тестикьарзавай къалп сертификатар гунай шак физвай Махачкъаладин поликлиникайрикай сана кIвалахзавай духтур ва республикадин клиникадин больницадин медсестра кьуна.
Къанун-къайда хуьдай органрин векилри тайинарайвал, абуру РФ-дин здравоохраненидин хилен государстводин малуматрин сад тир къурулушдив, гуя 6 касди рапар яна лагьана, къалп делилар агакьарна. И кардай абуру 33 агъзур манат пул къачуна.
Алай вахтунда абурун гьакъиндай кIватIнавай материал РФ-дин Силисдин комитетдин РД-да авай Управленидиз вахканва.
Лагьана кIанда, къалп сертификатар гузвайбур жавабдарвилиз чIугвазва. “Российская газета” чешмедиз юридический илимрин доктор Иван Соловьева ганвай интервьюда къейднавайвал, РФ-дин Уголовный кодексдин 327-статьядин 3-паюнал асаслу яз, къалп сертификат маса гузвайди, къачузвайди, хуьзвайди 1-2 йисан къене азадвиликай магьрум хьунин хаталувал ава. 236-статьядал асаслу яз, 80 агъзур манат жерме ийидай ва я мажбуридиказ кIвалахиз тадай ихтиярар ава.
Вири и крар фикирда кьурла, виридалайни хийирлу, саламат рехъ, жув яшамиш жезвай чкада авай духтурханадиз фена, коронавирусдиз акси раб ягъун я. Идалди куьне куь ва хизанрин, мукьва-кьилийрин сагъламвал хуьда.
Агьмед Магьмудов
