Ван авуна
Бажарагълу журналист, “Лезги газетдин” жавабдар секретарь Ш.Шихмурадован макъала (“Лезги газет”, 29-нумра, 22-июль) кIелайла, зун гъиле къелем кьуниз мажбур хьана. Ктабар гьелелиг зи гъиле гьатнавачтIани, макъалади зак еке шадвал, гьевес кутуна.
“Багьа чил — багьа накьвар” ктабдин автор Гьамидов Алаудинахъ галаз зи чIехи мукьва-кьиливилер ава: чун Ватандин ЧIехи дяведин йисарин аялар хьун, чи бубайри хайи Ватан хуьник чпин лайихлу пай кутун, 1962-1968-йисара чна ДГУ-да санал кIелун, 60 лагьай йисарилай инихъ “Лезги газетдихъ” галаз сих алакъа хьун. Низ чида Алаудина зи чарар гьикьван гъилелай — тупIалай авунатIа! Заз адан хизан, стхаяр мукьувай чир хьана. И алакъаяр гилани давам хьуни чак кьведакни шадвал кутазва.
Дяве — им каш, мекь, уьмуьр барбатIдай цIай-гум тирди виридаз ашкара я. Залум дяведи чи халкьдиз авур гужар, миллионралди инсанар телефай къизгъин женгер садрани рикIелай алатдач.
“Багьа чил — багьа накьвар” ктаб гьакIан чкадал арадал атанвач. Ам халис хвавилин, буба, диде кIанивилин, ватанперес, инсанперес касди юкъуз-йифиз датIана зегьмет чIугунин нетижа я.
Бубадин сур жагъуруникай Алаудин Гьамидова гьеле кIелзавай йисарилай инихъ фикирзавай. Ам адан эрзиман мурад тир. Мурад кьилиз акъатна. Ам яргъал сефердиз Тула шегьердиз фена. Ана бубадин сур жагъана. Анай хкведайла, суралай накьвар хкана, хайи ХпитIрин чилик акадарна. И чIехи метлебдин кар за дустуниз фад мубаракнай.
Гила за, чи хизанди Алаудиназ “Багьа чил — багьа накьвар” ктаб акъатун рикIин сидкьидай мубаракзава. Къуй вичихъ гележегда ислягь уьмуьрдикай чIехи — чIехи эсерар кхьидай сагъвал, мумкинвал хьурай!
Абдулашим Рамазанов,
зегьметдин ветеран.
Хив райондин Цналрин хуьр
