Ван авуна
Яратмишунрин дегьнейриз эвичI тавуна, гзаф делилар винел акъуд тавуртIани, журналист, писатель, тарихчи Нариман Ибрагьимов заз фадлай таниш, газет кIелзавайдаз адан кхьинрин хатI, михьи, лезги чIал, тема ачухунин къайда хуш я. КIелзавайди сифтедилай эхирдалди регьятдиз гъавурда гьатзава. Ихьтин фикир желбдай ерияр авазва а касдин кхьинрихъ. Гьавиляй за “Лезги газетдай” адан макъала жагъурна, сифтебурукай яз кIелзава. ИкI кIелуни зун ашкъиламишзава, журналистдин макъалайрай заз гзаф цIийи затIарикай хабар жезва, тарихдин хейлин делилар рикIел хквезва, алава яз, газет мадни кIан жезва.
Мукьвара за адан “РикIелай ракъурна виже къведач” кьил ганвай гегьенш макъала (“Лезги газет”, №25, 24-июнь, 3-чин) кIелна. Садра ваъ, гьелбетда, кьведра дикъетдивди кIелна.
Асул гьисабдай авторди тарихдин еке метлеб аваз хьайи, виликрай чи мектебра лап хъсан чкадал алаз кIвалахай аялрин интернациональный дуствиликай ихтилатзава. Мадни алава хъувуртIа, Кьасумхуьрел тешкилнавай, а вахтара тIвар-ван авай урус ва къецепатан чIаларин муаллим Басаров Мисриди идара ийиз хьайи интернациональный клубдикай вижеваз рикIел хканва. Сагърай вун, Нариман стха, и кардай. Заз Басаров хъсандиз чидай. Орджоникидзеда кIелдайла (заочно), сессийра чун санал жедай. Пионеррихъ галаз кIвалахдайлани, чун мукьвал-мукьвал санал алай, интернациональный клубдин кIвалахрикай, хтай чарарикай, открыткайрикай, бандеролрикай сада-садаз ахъайдай. Зун а вахтунда районда хъсан вожатыйрикай сад тир. Чазни клуб авай. Аниз масанрайни инсанар къведай, ана авай альбомриз ва маса затIариз тамашдай, тежриба чирдай. Райондин пионерринни школьникрин кIвалин директор Альберт Кьасумова ва адан заместитель, методист Азимов Азиза (рагьмет хьурай чпиз) чи кIвалахриз виниз тир къиметни гудай, семинаррал чешне яз къалурдай.
Эхь, интернациональный дуствилихъ вири вахтара еке метлеб, руьгьдин къуват хьайиди я. Инлай кьулухъни жеда. Макъалада къейднавай муаллим Евгений Тота дуьз лагьанва и жигьетдай. Ахьтин КИД-ар интернетдин ва маса такьатрин куьмекралди тешкилиз, дуствал гегьеншариз жедайдал шак алач. Сифте нубатда жуван уьлкведин къенепата: республикада, районда, хуьре. Ирс, тарих хвена кIанда. Масада ийидач и кар. Тарихдин сесинив, чIехибур вилик кваз, ван ийиз тун чи буржи я.
Райсудин Набиев
