Женгинин самбодай Россиядин, дуьньядин чемпион, какахьай женгерин пешекар пагьливан Ислам Мамедова Америкадин спортдин “Беллатор” тешкилатди 1-августдиз Лос-Анджелесда кьиле тухвай 263-турнирда Брент Примусан винел гъалибвал къачуна. Бягьсинин нетижада, судьяйрин къарардалди, Исламан гъалибвал раижна.
Чи ватанэгьлиди спортдин жуьреба-жуьре турнирра кьиле тухвай 21 бягьс 20 гъалибвал къачуналди акьалтIарнава. Ам анжах са сеферда кумукьна. Ислам Мамедов фадлай Гьабиб Нурмегьамедован командада спортдал машгъул жезва.
Им Ислам Мамедова “Беллаторда” кьиле тухванвай сад лагьай бягьс я. Къуй алакьунар авай викIегь спортсмендихъ машгьур тешкилатда гъалибвилерин цIиргъ давамардай мумкинвилерни къуватар хьурай!
Алава: Лос-Анджелесда кьиле фейи турнирда иштиракай муькуь пуд дагъустанви спортсмендини гъалибвал къачуна.
«Лезги газет»
