РФ-дин Президент Владимир Путина алай йисан 2-июлдиз акъудай «Аялар авай хизанриз са сеферда гудай пулдин такьатрин гьакъиндай» къарар сифтедай тайинарай муддатдилай кьве гьафтедин фад кьилиз акъудна.
Сифтедай и такьатар 16-августдилай башламишна гудайвал тир, амма гуьгъуьнлай уьлкведин регьбердин теклифдалди абур 2-августдиз диде-бубайрив агакьарун кьетIна. ИкI, 17 миллион аялдиз талукь такьатар чи уьлкведа анжах 2-августдиз абурун диде-бубайрив агакьна. Гьа жергедай яз – Дагъустандин хизанривни.
ТIвар кьунвай пулдин куьмекар 6 йисалай 18 йисал кьван яшара авай аялриз талукь я. Мектебрин 9-классар куьтягьна, колледжрик, училищейрик экечIнавай, 18 йисалай артух яшар тамам тахьанвай жегьилризни, сагъламвилин гьалдиз килигна мумкинвилерал сергьят алай, 18-23 йисан яшара авай, чпи умуми образованидин программайрай чирвилер къачун давамарзавай жегьилризни талукь я.
Винидихъ къалурнавай яшара авай гьар са аялдал 10 агъзур манат гьалтзава. Гьакъикъатдани, аялар авай хизанриз авунвай и куьмекди диде-бубайрин гъил кьазва.
Такьатрин патахъай «Лезги газетдин» мухбирдиз Докъузпара райондай тир А.Абдуллаева вичин фикир лагьана:
— ТIугъвалди агъавалун давамарзавай муддатда гьукуматди чара ийизвай пулди чун хьтин хизанриз еке куьмек гузва, иллаки мектебриз фидай гьазурвилер аквазвай чIавуз. Коронавирусди сифте яз гьужум авур алатай йисузни ихьтин куьмекар ганай. Месела, 2-августдиз зи кьве аялдиз санлай 20 агъзур манат атана, им зун патал гъвечIи пул туш. Исятда мектебдиз гьазур хьун патал хейлин затIар, тадаракар маса къучуна кIанзава, гьавиляй им диде-бубаяр патал хъсан пишкеш хьанва, — лугьузва аялар цIийи кIелдай йисаз гьазурзавай А.Абдуллаева.
Уьлкведин чешмейрин делилралди, са сеферда гузвай такьатар патал санлай 200 миллиард манатдилай гзаф пул чара авунва.
«Сифтедай лагьай вахтунилай кьве гьафтедин фад, яни 16-августдилай ваъ, 2-августдилай пулар агакьаруни диде-бубайриз чпин веледриз герек затIар мектебдиз фидалди вилик вахтунда амаз маса къачудай мумкинвал гузва», — алава хъувуна А.Абдуллаева.
Къейд ийин, 10 агъзур манатдин такьатриз талукь арзаяр диде-бубайривай Госкъуллугърин сайтда, Пенсийрин фондуна ва МФЦ-дин идарада вугуз жеда.
Чи мухбир
