Дагъустандин Конституциядин йикъан гьуьрметдай республикадин образованидин къуллугъчиярни къейдна. Дагъустан Республикадин образованидин ва илимдин министрдин везифаяр вахтуналди тамамарзавай Ягья Бучаева кIвалахда тафаватлу хьайи муаллимриз сувар тебрикна ва абурув РД-дин Кьилин патай медалар ва маса шабагьар вахкана.
— Квез за гьуьрметдин тIварар гун рикIин сидкьидай тебрикзава, — лагьана Я.Бучаева. — Чи чIехи тир Россиядин жаванар, жегьилар тербияламишунин, абуруз чирвилер гунин карда куьне тухузвай кIвалах важиблуди ва екеди я. Куьн хьтин лайихлу муаллимри чи школайра кIвалахзавай кьван гагьда чи республика мадни къуватлу жеда.
Министрдин гъиляй шабагь къачур Махачкъала шегьердин 35-нумрадин гимназиядин директордин заместитель Светлана Зайковскаяди лагьана: “Зун Дагъустандиз Владивостокдай 20 йис идалай вилик атана. Къе заз Дагъларин уьлкве жуванди хьанва. Къе заз ганвай шабагьдик зи коллективдин лайихлу пайни ква”.
Чи мухбир
