Дагъустанда COVID-19 чукIунин вилик пад кьунин рекьяй республикадин Оперштабдин нубатдин заседание алатай гьафтеда РД-дин Кьилин везифаяр вахтуналди тамамарзавай Сергей Меликова видеоалакъадин куьмекдалди кьиле тухвана.
Региондин регьберди къейд авурвал, коронавирусдин азардихъ галаз алакъалу гьалар Дагъустанда икьван чIавалди тахьай хьтин муракаббур я. Месела, 19-июлдиз республикада агьалийрик ковид акатай 199 цIийи дуьшуьш дуьздал акъатна. ТIугъвал пайда хьайи вири девирда ихьтин рекъем хьайиди туш. С.Меликова малумарайвал, майдин юкьварилай инихъ коронавирусдик начагъ яз азарханайра къатканвайбурун кьадар 7,5 сеферда артух хьанва. “Азарлуйрин кьадар гзаф хьун фикирда кьуна, начагъбур сагъардай алава чкаяр кардик кутун чарасуз я. Азарди гзаф азаб гузвай, ам яцIара гьатнавай начагъбур пара жезвай муддатда абур къаткурдай ва сагъардай мумкинвилер гегьеншарун иллаки важиблу я. Къенин юкъуз гзафни-гзаф вирусдин Индиядин штамм хаталу я”, — лагьана ада.
С.Меликова медицинадин гьукуматдинбур тушир идарайрин сагьибриз, духтурриз герек вахтунда ковиддиз акси женг тухунин карда куьмекар гуниз эвер гана. Адан гафаралди, коронавирус акатайдалай кьулухъ сагъ хъхьанвайбурун сагъламвал мягькемарун ва гуьнгуьна хтун патал гьукуматдинбур тушир медидарайривай агьалияр кьабулиз жеда ва и карди цIийиз вирус акатзавайбур патал “яру зонада” чарпаяр азаддай мумкинвал гуда.
Заседанидал мадни къейд авурвал, РД-дин МВД-дин къуллугъчийри Роспотребнадзордин векилрихъ галаз санал санитариядинни тIугъвалдин истемишунрал амал тавуна кIвалахзавай 300-далай гзаф объектар тайинарна. Азарди кьил хкажнавай макъамда талукь тир истемишунар вилив хуьн тийизвай тахсиркарвилерай 110-далай гзаф административный делояр къарагъарна, 95 дело суддив агакьарнава. Тахсиркарвилериз талукь яз дуьздал акъуднавай 128 делилдай делояр къарагъарунин кар давам жезва.
Дагъустан Республикадин здравоохраненидин министерстводи кьиле тухвай ахтармишунрал асаслу яз, коронавирусдиз акси рапар ягъай агьалияр азарлу хьайи дуьшуьшарни ава, амма абурун кьадар 3 процентдилай виниз туш. Идалайни гъейри, вакцинация авурдалай кьулухъ вирус акатайбуру азар кьезил жуьреда алудзава.
Сергей Меликова вичи коронавирусдиз акси раб янавайдакай ихтилатна. “За коронавирусдиз акси “Спутник V” раб яна. Заз жуван багърийрин, мукьвабурун уьмуьрар багьа я. Заз жувахъ галаз къуллугъзавайбурун рафтарвилерни багьа я, заз абур хаталувилик, тевекулдик кутаз кIанзавач”, — лагьана Дагъустандин регьберди.
Дагъустанда алатай гьафтеда коронавирусдиз акси рапар янавай агьалийрин кьадар 211 агъзурдав агакьнавай. Идалай вилик Оперштабди кьиле тухвай заседанийрал 60 йисалай виниз яшар хьанвайбуру, хкат тийидай жуьреба-жуьре азарар квайбуру, медицинадин, социальный къуллугъчийри, муаллимри вакцинация кьиле тухунин месэла веревирднай. С.Меликован гафаралди, халкьдин ихьтин къатариз рапар ягъунин жигьетдайни тайин нетижаяр арадал атанва. Санлай рапар янавайбурун умуми кьадардикай 37 агъзур кас яшлубур я, 30 агъзур — медицинадин къуллугъчияр, 36 агъзур — образованидин хилен къуллугъчияр.
Региондин регьберди кIелунин цIийи йисаз гьазур хьун патал алава серенжемар кьабулунин ва муаллимринни студентрин арада вакцинация кьиле тухунин еришар йигинарунин чарасузвал авайдакай хабар гана.
РД-дин здравоохраненидин министр Татьяна Беляевади медицинадин куьмекар гун патал кьабулзавай серенжемрикай, дарманралди таъминвиликай ихтилатна. Адан гафаралди, коронавирусдик рекьизвайбурун кьадар эхиримжи гьафтеда гзаф хьана. Къейд авурвал, алатай гьафтедин пуд йикъан къене 10 кас кечмиш хьана. Беляевади алава хъувурвал, республикадин азарханайрикай сана алава яз 80 чарпай кардик кухтада. Идалайни гъейри, адан гафаралди, бязи начагъбур медицинадин гьукуматдинбур тушир идарайриз ракъурда.
Т.Беляевади хабар гайивал, амбулаторный азарлубур патал региондив федеральный бюджетдай 20 миллион манатдин къимет авай дарманар агакьна. Абур вири медицинадин идарайриз пайнава.
Коронавирус чукIуниз рехъ тагунин патахъай кьиле тухузвай серенжемрикай ихтилатдайла, РД-дин Роспотребнадзордин управленидин регьбер Николай Павлова малумарайвал, Дагъустандин кьилдин ватандашриз азардин вилик пад кьунин рапар ягъунин гьакъиндай къарар кьабулнава. Адал асаслу яз, здравоохраненидин, образованидин, яшайишдин рекьяй хуьнин, алишверишдин хилера, жемиятдиз тIуьнар гудай чкайра, гуьрчегвилихъ гелкъведай салонра, фитнес-клубра ва масанра кIвалахзавайбуру вирусдиз акси рапар ягъун чарасуз жезва. Идалайни гъейри, финансрин тешкилатра муьштерийрихъ галаз кIвалахзавайбуру, почтадин алакъадин къуллугъар кьилиз акъудзавайбуру, жемиятдин улакьрин, МФЦ-дин, СМИ-рин, ЖКХ-дин къуллугъчийри, медениятдинни марифатдин мярекатар тешкилзавайбуру рапар ягъунин лазимвал тестикьарнава.
«Лезги газет»
