Россиядин хейлин регионра гьуьлерин дяведин флотдин югъ шад гьалара къейдна. Адаз талукь яз хейлин шегьерра, гьа гьисабдай яз Каспийск шегьердани, гимийрин военный парадар кьиле фена. 25-июлдиз Каспийскда хьайи парадда Дагъустан Республикадин Кьилин везифаяр вахтуналди тамамарзавай Сергей Меликовани иштиракна.
Сифтедай ам 71-нумрадин военный городокдиз, анай Каспийскдин флотилиядин командующий Александр Пешковахъ галаз катерда аваз параддин цIиргъина акъвазнавай флотилиядин гимийрин патав фена ва экипажриз сувар тебрикна. Параддин жергейра ракетайрин, артиллериядин ва сергьятар хуьзвайбурун гимияр акъвазнавай.
Флотилиядин гимияр акъвазнавай тегьердиз килигна, Сергей Меликов ва Александр Пешков трибунадихъ хтана. Абуру ва гимийрин экипажри Россиядин Федерациядин Президент Владимир Путинан рахунрихъ яб акална. Президентди ВМФ-дин вири экипажриз сувар тебрикна. Ада къейд авурвал, алай вахтунда уьлкведин ВМФ-дихъ Ватандин ва милли итижар хуьдай вири мумкинвилер ава. “Чи гимийрихъ ва техникадихъ исятда цин винелай ва кIаникай фидай, цава лув гузвай вири жуьредин техника жагъурдай ва, герек атIайтIа, ам ядай мумкинвилер ава”, — лагьана В.Путина.
Гьуьлуьн къерехда кIватI хьанвай инсанриз театрламишнавай пара гуьзел тамаша ва Каспий гьуьлуьн цел сирнавзавай, яракьар ишлемишзавай гимияр, абура къуллугъзавай морякар акуна. Морякри жуьреба-жуьре хилерай чпин алакьунар къалурна. Гимийрин ударный дестеди, авиациядин куьмекни галаз, шартIлу душмандин гимийрихъ галаз женг чIугуна. Россиядин ФСБ-дин Дагъустанда авай сергьятдин управленидин гьуьлуьн къерехар хуьзвай подразделенидини вичин алакьунар раижна. 40 гимидилай гъейри, суварин мярекатда 50-далай виниз военный ва махсус техникади, алай аямдин самолетрини иштиракна.
Сергей Меликова гимийрин парад хъсандиз тешкилунай талукь ксариз сагърай лагьана ва къуллугъда тафаватлу хьайи морякрив государстводин шабагьар вахкана.
Шадвилин мярекатрилай гуьгъуьниз Сергей Меликова ва Александр Пешкова журналистрин суалриз жавабар гана. А.Пешкова малумарайвал, Каспий гьуьлел кьиле фейи парадда женгинин 25 гимиди ва катерди, лув гудай 16 аппаратди, 15 гимиди ва 1500 морякди иштиракна. Ада гьакI Каспийскдин флотилияда къуллугъзавай офицерринни морякрин устадвал, алакьунарни къейдна.
Лугьун лазим я хьи, Каспийскда военный парад кьвед лагьай сеферда хьана.
«Лезги газет»
