Коронавирус яваш жезвач
Россияда эхиримжи йикъара коронавирус акатзавай цIийи дуьшуьшрин кьадар 20 агъзурдалай виниз жезва. Оперативный штабди вичин Telegram-каналда малумарайвал, уьлкведа вирус акатнавайбурун кьадар 6 миллиондилай алатнава.
Ковидди акIажарзавайбурун кьадар иллаки Москвада, Московский областда, Санкт-Петербургда гзаф жезва. Магадандин область, Ненецкий ва Чукотский автономный округар коронавирус акатзавай дуьшуьшар виридалайни тIимил авай регионар я.
Къейд ийин, тIугъвал пайда хьайидалай инихъ адакди чи уьлкведа 150 агъзурдалай гзаф агьалияр кьена.
Куьмек хиве кьуна
Тажикистандин хатасузвал мягькемарун патал Москвади Душанбедиз алай девирдин яракьар, военный техника ракъурдайвал я. Идакай Россиядин векил И.Лякин-Фролова “Коммерсантъ” чешмедиз ихтилатна.
Къейдзавайвал, Афгъанистандай тир экстремистрихъ галаз женг чIугунин карда Москва Тажикистандиз гележегдани куьмек гуз гьазур я.
Идалай вилик малумарайвал, Россияди, Тажикистанди ва Узбекистанди Афгъанистандихъ галаз авай сергьятдивай 20 километрда экIя хьанвай женгерин вердишвилер къачудай Харб-Майдон майдандал уртах военный серенжемар тухуда.
Афгъанистанда гьалар 1-майдиз США-ди ва НАТО-дин уьлквейри а мулкарай чпин кьушунар ахкъудиз эгечIайдалай кьулухъ къизгъин хьана. Ж.Байдена Америкадин армия 11-сентябрдалди Афгъанистандай тамамвилелди эхкъечIда лагьана. Америкадин кьушунар эхкъечIайдалай кьулухъ Афгъанистандин меркездин аэропортунин хатасузвал таъминарунин месэла Туьркияди вичин хивез къачун кьетIнава.
Саки са паюни ихтибарзавач
США-дин виликан президент Д.Трампан фикирдалди, уьлкведа коронавирусдиз акси рапар ягъунин еришар яваш хьун Ж.Байденаз америкавийри ихтибар тавунихъ галаз алакъалу я. Адан гафаралди, саки са пай ватандашриз чпин регьбер нуфузлу туш. Адан гафар “ТАСС” чешмеди раижнава.
Малум делилралди, алай вахтунда США-да 48,5 процент халкьдиз ковиддиз акси рапар янава. Хопкинсан университетди къалурнавай рекъемралди, Америкада 34 миллиондилай гзафбурук коронавирус акатна, 609 агъзурдалай гзаф агьалияр кьена.
Умуд атIанвач
Украинадин виликан президент П.Порошенкоди са йисан къене Крым Украинадик кухтун хиве кьуна. Идакай ада вичин Facebook-аккаунтда кхьенва.
Вичин нуфузлувал къалурунин ниятдалди Порошенко Украинада авай вири мусурманрихъ элкъвена, Къурбанд суварихъ галаз алакъалу гафар рахана. Ада гуя са йисалай Бахчисарайда авай агьалийривай и сувар ана азадвилелди кьиле тухуз, саналди тир къуватралди Крым вахчуз жеда лагьана умудар кутуна.
Чарар-цIарар амукьдач
Вице-премьер Д.Чернышенкоди къейд авурвал, Россияда мукьвара чарарин справкайрин девир эхирдал къведа. Идакай “Новости” РИА-ди хабар гана.
Къейд авурвал, 2024-йисуз Россиядин ватандашривай вири справкаярни выпискаяр герек атай береда гьасятда электронный жуьреда къачуз жеда. Мадни алава хъувурвал, 2022-йисан эхирдалди 200-далай гзаф къуллугъар онлайн-къайдадал элячIда.
Куьгьне телефонар гадармир
Роскачестводин рекъемрин затIар ахтармишзавай пешекар С.Кузьменкоди куьгьне смартфонар гадар тавун теклифзава. Ада къейд авурвал, гаджетар гьазурдайла, инсанар ва тIебиат патал зарарлу затIар ишлемишзава, гьавиляй абур адетдин зирзибилдихъ галаз гадарун хъсан туш. Идакай “Прайм” агентстводи хабар гузва.
Пешекардин гафаралди, телефонрин гзафни-гзаф хаталу затIарик аккумулятор акатзава. Кузьменкоди мадни рикIел хкана хьи, чIур хьанвай телефонар какатай жуьреда зирзибилрихъ галаз гадарунай, РФ-дин КоАП-дин 8-статьядал асаслу яз, агьалияр 2 агъзур манатдал кьван жерме ийизва.
«Лезги газет»
