“Россия мумкинвилерин уьлкве я” АНО-дин региональный коммуникацийрин хилер идара ийизвай кар алай пешекар Виктор Рябокона хабар гайивал, “Россиядин 2021-йисан башчияр” конкурсдин очный паюна иштиракун патал Дагъустандай 60 иштиракчидиз теклифнава. Абурукай 14 — “Бизнес ва промышленность”, 36 — “Государственный управление”, 2 — “Здравоохранение”, 7 — “Илим” ва са касни “Студентар” рекьерай гъалибвал къазанмишнавайбур я. Санлай къачурла, Россиядин вири регионрай конкурсдин мярекатриз 3987 касдиз теклифнава.
Арада мензил авай къайдада хкянавай иштиракчийри гъалибвал патал чпин алакьунар финалра къалурда.
Гъилевай йисуз “Россиядин 2021-йисан башчияр” конкурсдиз уьлкведин 85 региондай ва дуьньядин 150 уьлкведай 180953 касди арзаяр рекье тунвай. Конкурсда иштиракдай ихтияр 72561 касдиз ганвай. Кьвед лагьай паюнай 12,499 кас экъечIна. Заочный имтигьанар 3987 касди кьилиз акъудна.
Алай йисуз “Россиядин башчияр” конкурс 8 хилез пайнава. Абурук акатзава: “Илим”, “Здравоохранение”, “Бизнес ва промышленность”, “Государственный управление”, “Культура”, “Информациядин технологияр”, “Студентар” ва “Международный”.
Имтигьанрай хъсандиз экъечIайбурун 40 процент карчивилел машгъул жезвайбур, 29 процент государстводин гьукумдин органра кIвалахзавайбур я. Савадлувилел гьалтайла, иштиракчийрин 96 процентдихъ кьилин образование, 26 процентдихъ кьилин кьве образование ава, 11 процент илимрин кандидатар я.
Къейд ийин, арада мензил аваз иштиракдай паюнай Россиядин шегьеррин ва районрин администрацийрин 12 кьил, абурун 16 заместитель, Россиядин субъектрин гьукум идара ийидай органрин 11 руководитель, гьукумдин региональный органрин кьилерин 26 заместитель, чIехи ва гьакI гъвечIи карханайрин 90 директор ва 101 карчи экъечIна.
ЦIи 13 финал кьиле фида. Абурукай 7 региональный финалар жеда. 5 финал Москвадани Санкт-Петербургда кьиле фида.
Гъалибчийриз “Россиядин башчияр” конкурсдин суперфиналдиз теклифда. Ана гъалибвал къазанмишай 300 касдиз са миллион манатдин грантар гуда.
«Лезги газет»
