Мукьвара Москва шегьерда, 15-сеферда яз, Россиядин Президентдин Кубок патал самбодай къуватдин къурулушрин командайрин арада акъажунар кьиле фена. Ана жуьреба-жуьре командайрик кваз гзаф къуватлу спортсменри — Россиядин, Европадин ва дуьньядин чемпионатрин гъалибчийрини призерри иштиракна. Ида абурун арада кьиле фейи акъажунрин къизгъинвални артухарна.
Дагъустандин къуватрин къурулушрин хкянавай командадик кваз Президентдин Кубокда ери-бине Кьасумхуьрелай тир машгьур спортсмен, универсальный женгерай 4 сеферда дуьньядин чемпион, самбодай Россиядин Кубокдин 2-призер, дзюдодай Вирироссиядин гзаф турниррин гъалибчи Аслан Къурбанова иштиракна. Ада пуд бягьсина, гьабурукай яз полуфиналда самбодай дуьньядин чемпионатдин 2-призер Виктор Осипенкодин винел (2:0 гьисабдалди) гъалибвал къачуна.
Финалда Россиядин спортдин лайихлу мастер Аслан Къурбанов, гьайиф хьи, саки барабар женгина Москвадай тир дуьньядин ва Россиядин чемпиондиз кумукьна. Нетижада Аслан Къурбанов Россиядин Президентдин Кубокда приздин 2-чкадиз лайихлу хьана.
Чна и агалкьун Аслан Къурбановаз ва адан дах, мукьвара Россиядин лайихлу тренер лагьай чIехи тIвар гуниз лайихлу хьайи Юрий Къурбановаз мубаракзава. Чи мурад Асланахъ — спортда, Юрий Ибрагьимовичахъ тренервилин кIвалахда мадни еке агалкьунар хьун я.
Хазран Кьасумов
