И мукьвара РД-дин образованидинни илимдин министрдин везифаяр вахтуналди тамамарзавай Яхья Бучаеван къарардалди Альбина Сефербеговна Арухова А.А.Тахо-Годидин тIварцIихъ галай Дагъустандин илимдинни ахтармишунрин педагогикадин институтдин директордин везифаяр тамамардайди яз тайинарна.
А.Аруховади гьукуматдин жуьреба-жуьре къуллугъар кьилиз акъудна. Ам гьукуматдин II классдин советник, РФ-дин умуми образованидин сейли къуллугъчи, РД-дин образованидин отличник, РД-дин образованидин лайихлу къуллугъчи, философиядин илимрин кандидат я. 2006-йисалай 2021-йисан июндалди ада РД-дин образованидинни илимдин министрдин заместителдин къуллугъдал гьакъисагъвилелди кIвалахна.
Алай йисан мартдиз РД-дин кьилин везифаяр вахтуналди тамамарзавай Сергей Меликован къарардалди Альбина Сефербеговнадин зегьмет “Дагъустан Республикадин вилик лайихлувилерай” ордендалди къейдна.
“Лезги газетдин” редакциядин коллективди А.Аруховадиз цIийи къуллугъ мубаракзава. Къуй бажарагълу регьбердихъ кIвалахда еке агалкьунар хьурай!
А.Аруховадихъ галаз кьиле тухвай гегьенш интервью “Лезги газетдин” къведай нумрадай кIелиз жеда.
«Лезги газет»
