Эхиримжи йикъара тIугъвалдик начагъ жезвайбурун кьадар акваз-акваз артух хьуни Роспотребнадзордин къуллугъчийрик къурху кутунва ва идаз килигна талукь серенжемарни  кьабулун мумкин я.

6-июлдиз коронавирусдин инфекция акатуниз акси кIвалах тухузвай оперативный штабдин нубатдин заседание кьиле фена. Анал тIугъвалди арадал гъизвай гьалар писбур хьунихъ галаз алакъалу яз кьабулун герек тир серенжемрин, медицинадин идарайра алава отделенияр, палатаяр ачухуникай ва анагар бес кьадарда дарманралди, рапаралди таъминарунин месэлаяр веревирдна.

РД-дин Кьилин везифаяр вахтуналди тамамарзавай Сергей Меликова малумат гайивал, эхиримжи суткада медицинадин идарайриз жигерар тIазваз ва ифин алаз кьабулнавайбурун кьадар 468 касдив агакь­на. Гъилевай йисан сифте варцарив гекъигайла, им лап еке рекъем я. Региондин регьберди къейд авуна хьи, оператив­ный штабдин къарарар вахтунда ва тамамвилелди кьилиз акъудунин гьакъиндай исполнительный властдин органрин ва муниципальный тешкилатрин кьилерин хиве жавабдарвал гьатзава.

РД-дин Гьукуматдин Председателдин заместитель Мурад Къазиева оперативный штабдин алатай заседанидин къарарар кьилиз акъудзавай гьалдикай малумат гана ва республикадиз вакцинадин 190 агъзур доза гъайидакай ва адакай 34 агъзур доза амайдакай лагьана.

РД-дин здравоохраненидин министр Татьяна Беляевади хабар гайивал, алатай­ суткада тIугъвалдик 168 кас начагъ хьана.­ Алай вахтунда республикадин больни­цайра и азардик начагъ 3,6 агъзур кас ава. Алатай варцарив гекъигайла, исят­да­ юкь­ван гьисабдалди гьар суткада больни­цайра къаткурзавайбурун кьадарни гзаф хьанва. Амбулаторный къайдада сагъар хъийизвайбурун кьадарни тIимил­ди туш.

Татьяна Беляевади регионда вакцина ишлемишзавай гьалдикайни лагьана. ТIугъ­валдиз акси рапар янавайбур махсус сиягьра къейдзава. Вакцина ишлемишзавай тегьердиз килигна, ам республикадиз агакьарни ийизва.

— Чахъ исятда ахьтин районар ава хьи, — лагьана Т.Беляевади, — рекье тунвай вакцинадин анжах 60 процент ишлемишнава. Абурук Къули, Чарода районар, Бежтадин участок ва Южно-Сухокумск ше­гьер акатзава. Агъул, Ахвах, Гергебиль, Гу­ниб, Дахадаев, Лак районра анжах 70 процентдин вакцина ишлемишнава.  Вак­ци­­надин кьитвал авач. И йикъара чав мад­ни­ 13 агъзур доза агакьда.

Здравоохраненидин министрди ма­лумарайвал, июлдин сифтегьан 6 юкъуз тIугъ­­валдик начагъ хьайи 99 кас рагь­мет­диз­ ­фена. И карди виридак къалабулух ку­тун­ва. Эгер апрелдин варз фикирда кьур­тIа, икь­ван инсанар вацран вахтунда чавай къа­къатнавачир. Гила — 6 юкъуз. ГьакI хьайи­ла, вири агьалийри вакцинадиз акси рапар ягъун чарасуз кар я, — лагьана министрди.

Роспотребнадзордин республикада авай управленидин регьбер Николай  Павлова лагьайвал, тIугъвалдик начагъ жезвайбурун чIехи пай яшлубур я. Амма  эхи­римжи варцара аялрин (15-17 йисара авайбур) арадани начагъ жезвайбур гзаф я, ахьтинбур студентрин арадани ава. Ву­чиз­ икI жезва лагьайтIа, гзаф инсанар кIватI жезвай чкаяр талукь дарманралди гьялзавач. Хейлин районра, шегьерра и кардиз ерли фикир гузвач. Гьа са вахтунда хейлин идарайри оперативный штабдин къараррал амалзавач. Инсанар гзаф кIватI жедай мярекатар тешкилзава, кьиле тухузва. Общественный чкайра, улакьра агьалийри маскаярни алукIзавач.

ТIугъвалдин вилик пад кьун патал Ни­колай Павлова ихьтин серенжемар кьиле тухун теклифна: агьалийри маскаяр алу­кIунин гьалдал гуьзчивал тухун; республикадин мулкуна инсанар гзаф кIватI­завай мярекатар тухунал эхир эцигин; общест­венный тIуьнардай карханайра махлу­кьат кIватIзавай мярекатар тухунал къадагъа эцигин. И карханайра Роспотребнадзордин истемишунрал тамамвилелди амал ийидайвал гуьзчивал тухун; азад вах­тун­да машгъулардай серенжемар тешкилзавай идарайрин кIвалах акъвазарин; мис­кIин­риз физ, кпIар авунал вахтуналди къадагъа эцигин; совещанияр, конференцияр, собранияр ва ибуруз ухшар маса мя­ре­­катар онлайн жуьреда кьиле тухун. 2021-йисан 31-июлдалди 65 йисалай виниз яшда авай инсанар самоизоляция ийидай гьалар давамарин.

РД-дин Гьукуматдин Председателдин Сад лагьай заместитель Нуьсрет Омарова алатай йисуз тIугъвалдин вилик пад кьу­нин серенжемар кьиле тухуниз региондин бюджетдай 2,6 миллиард манат ча-ра авурдакай лагьана. Алай йисуз и крар па­тал республикадин бюджетдай 260 миллион манат ахъай­нава. Ада къейд авур­вал, республикада арадал атанвай гьалар фикирда кьуна, са миллиард манат резервда тадайвал я. 400 миллион манатдихъ тест-системаярни къачуда.

«Лезги газет»