Гьикаятдин парчаяр
Лезгийрин алай аямдин яшлу писателрикай сад тир Назир Мирзоеван и йикъара 90 йис жезва. Идакай саки 70 йис ада хайи чIалан хазинадиз, ам виликди тухуз, художественный рангарикай гьикаятдин гуьзел парчаяр храз, руьгьдин кьетIен женгиниз бахшнава.
Уьмуьрдин хъутIалри ам алаз хьиз гатана. Виридалайни агъурди касдивай вилерин экв (ишигъ) къакъудун я. Ада хайиди тир Смугъулрин хуьре вичин вири къанажагълу, сагълам йисар (уьмуьр) акьалтзавай несилар халисан ватандашар яз, хайи чилел ашукь, инсанвилин ерийриз мягькем, гележегдихъ инанмиш кьегьалар яз тербияламишуниз, абуруз биологиядин илимдай дуьз чирвилер гуниз бахшна.
Писателдин дуст, бажарагълу журналист, шаир ва гьикаятчи Абдулрашид Рашидова вичин хейлин макъалайра Назиракай лагьанва:
— “Гьеле 10-класс куьтягьна, хуьруьн библиотекада кIвалахиз хьайи йисара ктабрин алемда гьатай жегьилдиз яратмишдай гьиссер, бажарагъ кьисмет хьана. Гьа йисарилай башламишна, Назира “ЦIийи дуьнья” газетдин къвалав тешкилай, Дагъустандин халкьдин писатель, рагьметлу Къияс Межидова регьбервал гуз хьайи “Самурдин сес” литобъединенидин ва газетдин кIвалахда активнидаказ иштиракиз хьана…”
Ибур, заз чидай делилралди, алатай ХХ асирдин 60-70-йисар тир. Гьеле Миграгърин юкьван школада кIелзамай за, Назир Мирзоевахъ ва Абдулрашид Рашидовахъ галаз санал Махачкъалада 1962-йисуз кьиле фейи Дагъустандин жегьил писателрин совещанида иштиракнай. А чIавуз къелемдин и чIехи стхайрин са шумуд цIуд хъсан эсерар (гьикаяяр, басняяр, шиирар, мажараяр) газетризни журналриз акъатнавай.
Назир Мирзоеван хатI, гьа вичи тарс къачур устадар — Къияс Межидованни Хуьруьг Тагьиран, Алирза Саидованни Межид Гьажиеван хьиз, михьиди, чIалан рангламишдай такьатралди девлетлуди, фад гъавурда акьадайди я. Адан гьикаяйрин, гуьгъуьнлай повестринни сюжетар, образрин тамамвал устадвилин жигьетдай вини дережадинбур я.
“Коммунист” (гила “Лезги газет”) газетдиз акъатай гзаф эсеррай Назир Мирзоеваз кутугай шабагьар, дипломар гайидини чи рикIел алама. Н.Мирзоева 1954-1958-йисара Дагъустандин пединститутдин (гила ДГУ) естественно-географический факультет акьалтIарна. Идалай кьулухъ ада Осетиядин госуниверситетдин биологиядин факультетдани кIел хъувуна (заочно).
Хуьруьн муаллим ва машгьур мухбир а йисара са шумудра хуьруьн ва райондин советриз депутатвилени хкяна. 1976-йисуз адан зегьмет “Знак Почета” орден гуналди къейдна. Ибурал “РД-дин халкьдин просвещенидин отличникдин” ва “РД-дин лайихлу муаллим” лагьай гьуьрметдин тIварарни алава хъхьана.
Н.Мирзоеван къелемдикай “Цуькверин ваза”, “Къизилдин хтар”, “Цаз алай цуьк”, “Рагъ циферикай хкатна”, “Ватандиз хъша”, “Талисмандин зунжур”, “ТIурфан” ва гзаф маса ктабар (гьикаяяр ва повестар) хкатна. Адан эсерар чи мектебрани колледжра, вузра кIелзава. Вичин вири яшара, винидихъни къейднавайвал, Назир Мирзоева “Лезги газетдихъ” галазни сих алакъа хвена. Гьатта вилер зайиф хьанвайлани, ада чав гьикаятдин самбар эсерар агакьарна.
Писатель Каспийск шегьерда вичин багърийрин патав яшамиш жезва. Чна адаз ва багърийризни 90 йисан юбилей рикIин сидкьидай мубаракзава.
Мердали Жалилов
