Эхиримжи вахтара жуван бедендин сагъламвал са акьван хъсан туширвиляй зун мукьвал-мукьвал духтуррин патав финиз ва абурувай куьмек тIалабуниз мажбур хьанва. Абурукай са шумудакай за макъалаяр кхьенай, жуваз куьмек гайи духтурриз чухсагъул лагьанай. Алай вахтунда дуьньядиз чкIанвай тIугъвалдикай хуьн патал ингье мад чун духтурривай куьмек тIалабуниз мажбур я. Инал разивилелди мадни са кар къейд ийиз кIанзава: гьар юкъуз духтуррин патав къвез, азардиз акси рапар язавай районэгьлийрин кьадар артух жезва…
Коронавирусдин азардик начагъ хьайила, заз райбольницадин са жерге духтурри чпивай жедай вири жуьредин куьмекар гайиди за рикIелай алудзавач. Заз сифте нубатда Будаева-Мегьамедова Саният духтурдин тIвар кьун кутугнаваз акуна. 50 йисалай виниз райондин агьалийрин къуллугъда акъвазнавай адан гъиликайни ширин мецикай гзаф азарлуйриз дава-дарман хьана.
КIвалахдин вахтунда Саният духтур, вичин яшаризни килиг тавуна, датIана гьерекатдик кваз жеда. Сад ава — кьин кьун, садни — жува хкянавай пешедиз жув гьакъикъатдани, рикIивай вафалу хьун. Зун инанмиш я хьи, Саният духтурдиз и кьве терефни хас я. МасакIа хьунни мумкин туш. Райондин агьалийрин сагъламвилин къуллугъда акъвазнавай цIудралди духтурри Саният Будаева-Мегьамедова чпин насигьатчи яз гьисабзава. Зур асирдилай виниз гьа са чкадал зегьмет чIугун, вичин буржи дериндай аннамишун, жегьил духтурриз хъсан чешне къалуриз алакьун — ибур гъвечIи агалкьунар туш.
И мукьвара зун Саният духтурдин патав фенвай. Жуван нубат гуьзлемишиз, кабинетдин ракIарихъ галайла, зун анихъ акъвазнавай районэгьлийрин ихтилатрин шагьид хьана. А келимайрини зун къелем гъиле кьуниз мажбурна лагьайтIа жеда.
Абуру Саният духтурдин ширин мецихъ аламатдин къуват авайди къейдзавай. “Белки, раб-дармандихъни гьакьван гужлу къуват авач жеди”, — са сивяй хьиз лагьанай абуру. Эхь, чи сагъламвал хуьнин карда галатун тийижиз, намуслудаказ зегьмет чIугвазвай вири духтурриз аферин!
— Заз жуван ирид хтулдин вилерай абурун бахтлу гележег аквазва. И кIвалах, белки, заз Аллагьдин патай бахт яз ганатIа? Жувакай датIана азарлуйриз са гьи дережада ятIани куьмек хьайивиляй за жуван веледрин ва хтулрин вилик жув уьзягъ яз гьасибзава. Мад идалай чIехи бахт жедани!? — лагьанай Саният духтурди, са сеферда чи арада суьгьбет хьайила.
Чи мурадни Саният духтурдин хизанда мадни хушбахтлувал, зегьметдани адан къуватар артух хьун я.
Абдула Семедов
