Алай вахтунда Дагъустанда фольклордин ва адетдин культурадин международный “Дагъвияр” XIX фестиваль кьиле физва. 28-июндиз ачухай ам 5-июлдалди давам жеда. Важиблу мярекатдиз гьазурвал акунин месэлайриз талукьарна, алатай жуьмядиз, яни ам ачухдалди вилик са шумуд югъ амаз, Махачкъалада, культурадин министерстводин конференц-залда, министр Зарема Бутаевади журналистрихъ галаз кьиле тухвай гуьруьшдал къейд авурвал, ЮНЕСКО-дин къаюмвилик кваз кьиле тухузвай фестивалда иштиракзавай коллективрин кьадар йисалай — суз гзаф ва адаз ийизвай итиж артух жезва.
Амма цIи, коронавирусдихъ галаз алакъалу яз дуьньяда, уьлкведа ва чи республикада арадал атанвай гьалар себеб яз, и мярекатда дуьньядин анжах 6 уьлкведай — Мексикадай, Ирандай, Азербайжандай, Белоруссиядай, ДНР-дай, ЛНР-дай, гьакIни Россиядин 14-далай гзаф регионрай атанвай ва Дагъларин уьлкведин фольклордин 50-далай виниз коллективри чпин устадвал къалурзава… Арада мензил аваз чпин устадвал къалурдайбурун жергеда Индиядин, Италиядин, Венгриядин ва Къазахстандин коллективар ава.
РикIел хкин: алатай йисуз фестивалдин тарихда сифте сефер яз ам тамашачияр галачиз ва Роспотребнадзордин РД-да авай Управленидин вири истемишунрал амал авуналди кьиле тухуниз мажбур хьанай. ЦIини гьалар са акьван пайгар тахьуниз килигна, гзаф мярекатар онлайн-къайдада кьиле тухунин къарар кьабулнава.
Пресс-конференциядал З.Бутаевади Дагъустанда международный фестивалдин сергьятра аваз кьиле тухудай программадикайни куьрелди лагьанай. Амни “кесибди” туш. Аник жуьреба-жуьре жанрайрин проектар ква: гала-концерт “Зи Россия — зи Дагъустан”, маскайрин фестиваль, “Фестивалдин открыткаяр” концерт ва икI мад. “Дагъвийрикай” рахадайла, министрди фестиваль кьиле тухузвай йисара чи республикадиз Европадин, Кьиблепатан Америкадин, Азиядин, Мукьвал тир РагъэкъечIдай патан 40-далай виниз уьлквейрай, гьа гьисабдай яз Туьркиядай, Латвиядай, Таиланддай, Хорватиядай, Словениядай, Мексикадай ва Россиядин саки вири регионрай тир яратмишунрин коллективар атайди, мугьманар виликан йисара ва гилани Дагъларин уьлкведин культурадихъ галаз еке ашкъидалди таниш хьайиди, гьа са вахтунда чпин устадвални къалурайди рикIел хкана.
2012-йисалай ЮНЕСКО-дин къаюмвилик кваз кьиле тухузвай “Дагъвияр” международный фестивалдин кьилин макьсад Дагъустандин, Россиядин ва дуьньядин халкьарин милли медениятдин ирс хуьн ва вилик тухун, жуьреба-жуьре халкьарин арада дуствилин алакъаяр мягькемарун я. Адан тешкилатчияр РФ-дин ва РД-дин культурайрин министерствояр, Россиядин ва Дагъустандин халкьдин яратмишунрин кIвалер, ЮНЕСКО-дин крарин рекьяй Комиссиядин Дагъустандин отделенидин патав гвай материальный тушир культурадин ирсинин Комитет, Россиядин халкьарин адетдин культурадин центраяр я.
Рагнеда Рамалданова
