Махачкъала шегьердин къваларив пуд миллиард манатдин къимет авай курортдинни мугьманханайрин Atlantis Marina комплекс эцигиз гъиле кьунва. РД-дин Кьилин ва Гьукуматдин Администрациядин пресс-къуллугъди хабар гайивал, проектдин инвестор карчи Игорь Исаев я.
14-июндиз эцигунар кьиле физвай гьалдихъ галаз РД-дин сад лагьай вице-премьер Батыр Эмеев таниш хьана. Адахъ галаз инвестордин векил Гъазимегьамед Гьажиевни авай.
Гьажиева ихтилат авурвал, Каспий гьуьлуьн къерехда чара авунвай чилел жуьреба-жуьре мертебайрин 8 дарамат эцигда. Комплексдик гьакI инсанар сагъардай ва реабилитациядин кIвалахар тухудай медицинадин центр ва пуд гектардин майдан кьадай апарт-отелар акатзава.
Проект уьмуьрдиз кечирмишуналди, гьуьлуьн къерехда гатуз ял ядай мумкинвилерни яратмишзава. Ина республикадин агьалияр ва мугьманар патал тарифлу пляж арадал гъида. Ам герек вири шейэралди тадаракламишда. Инсанривай катерра, луьтквейра аваз гьуьлелай сейрни ийиз жеда.
Инвестицийрин проект уьмуьрдиз кечирмишзавай эвел кьилера 350 касдиз кIвалахдай чкаяр яратмишда.
«Лезги газет»
