И йикъара Дагъустандин илимдинни общественностдин векилрив чIехи магьрумвал агакьна. Яргъалди чIугун тавур залан азардикди дуьньядиз машгьур алим — физик, технический илимрин доктор, профессор, образованидин тешкилатчи, яргъал йисара ДГТУ-дин кьиле акъвазай ректор, общественно-политический деятель, РД-дин Халкьдин Собранидин депутат,  меценат, “Лезги газетдин” еке дуст ва амадаг Тагьир Абдурашидович Исмаилов  рагьметдиз фена.

Т.А.Исмаилов 1953-йисуз Рутул райондин Ихрекрин хуьре муаллимдин хизанда ди­­­дедиз хьана. Мегьарамдхуьре юкьван шко­ла, ДГУ-дин физикадин факультет, ­Ленинградда аспирантура ва докторантура акьал­тIарна. Вичин вири уьмуьр ада Дагъус­тандин технический университетдихъ галаз алакъалу авуна. Неинки жегьилриз алай аямдин технический илимрай чирвилер гана, гьакI университет вични хейлин виликди тухвана.

Тагьир Абдурашидовичан гъиликай агъзурдалай виниз илимдин кIвалахар, цIудав агакьна монографияр хкатна. ЦIийи шейэрин 300-дав агакьна шагьадатнамаяр ва патентар къачуна.

Илимдин рекье къазанмишай кьетIен агалкьунрай адаз “РД-дин лайихлу изобретатель” (1993), “РД-дин илимдин лайихлу деятель” (1995), “РФ-дин кьилин пешекарви­лин образованидин Гьуьрметлу работник” ла­гьай тIварар, гьакьван жуьреба-жуьре шабагьарни тарифрин чарар гана.

Т.А.Исмаилов дуьньядин са шумуд академиядин академик тир. ДГТУ Россиядин лап хъсан 100 вуздин жергеда гьатна, адаз диплом ва къизилдин медаль гана.

Т.А.Исмаилован шабагьрик “Европадин ери” — къизилдин медаль, Ярослав Мудрыйдин орден, Пак Софиядин  орден (Великобритания), РФ-дин “Йисан ректор” (2004, 2005, 2009), “Петербургдин личность” тIварар ва гзаф масабур ква.

РД-дин Халкьдин Собранидин депутат, яз ада  вичин сечкичийрин гзаф истемишунар, тIалабунар тамамарна, гзаф крар кьилиз акъу­диз куьмекна.

Т.А.Исмаилован тIвар “Россиядин лап хъсан инсанар” (2003-2009), “Россиядин лап зурба деятелар” (2006), “Вуж вуж я дуьньяда…” — энциклопедийра, справочникра, биографический словарра кьунва.

Адаз ганвай “Россиядин Гьуьрметлу агьа­ли” — Кьилин Орден (2008) лап кьетIенди я. Ихьтин шабагьризни гьуьрметдин тIварариз лайихлу хьайи маса алим, общественно-политический деятель мад чаз чидач.

Гьа дережайра авайлани, ам чи газетдин дуст, гьакьван ачух ва гьуьрметлу кас, чи ама­­даг яз амай, вичивай жедай вири куьмекар гуз алахъдай.

Адан веледарни бубадин рекьяй фенва: тIвар-ван авай алимар, тешкилатчияр я гьабурни.

Чна рагьметлудан хизандиз, мукьва-кьилийриз, багърийриз, дериндай хажалат чIу­гунивди башсагълугъвал гузва.

Тагьир Абдурашидович Исмаилован экуь къамат чи рикIелай садрани алатдач.

“Лезги газетдин” редакциядин коллектив