20-майдиз Махачкъалада, ДГУ-дин физикадин факультетдин актовый залда, Кьиблепатан Дагъустандин студентрин II слет кьиле фена. Адан тешкилатчи республикадин “Кьиблепатан Дагъустандин жегьилрин Союз” общественный организация тир.

Мярекат ачухдайла, винидихъ тIвар кьунвай организациядин регьбер Равидин Абдурагьимова къейд авурвал, кьвед лагьай сеферда кьи­ле тухузвай слетдиз, шаз хьиз, цIини спонсорвал машгьур карчи, лезги халкьдин кьегьал хва Мамед Абасова авуна.

— Слет кьиле тухунихъ са шумуд макьсад ава, — лагьана Р.Абдурагьимова. — Чаз Кьиблепатан Да­­гъустандин студентрин арада илим, спорт, культура еримлу, и хи­лерал бажарагълу, кар алакь­дай­ жегьилар желб ийиз, абуруз чпихъ авай алакьунар ашкара ийидай мумкинвилер тешкилиз кIан­зава. Гележег акьалтзавай несилрилай аслу я. Гьавиляй республикада же­гьилрин жигьетдай кьабулзавай серен­жемриз кьетIен фикир гун лазим я. “Кьиблепатан Дагъустандин же­гьил­рин Союз” лагьай­тIа, кIва-лахдай, кукIушар муьтIуь­гъар­дай къаст авай гьар са жегьилдиз куьмек гуз гьазур я. Къуй квехъ ви­ридахъ еке агалкьунар хьурай, — акьал­­­тIарна вичин рахунар Р.Абдурагьимова.

Слетдиз теклифнавай гьуьрметлу  мугьманрин  арада  ДГПУ-­дин филологиядин факультетдин декан Руслан Къадимов, вахтуналди РД-дин Общественный палатадин председателдин везифаяр та­мамарзавай Алюсет Азизханов, ДГМА-дин лечебный факультетдин декан Разин Рагьимов, “Монолитхолдинг” ООО-дин Дагъустанда авай векил Жамиля Абасова, “Рутулар” фондунин председатель Вагьаб Къазибегов, Махачкъала шегьердин администрациядин спортдин, туризмдин ва жегьилрин крарин рекьяй комитетдин председатель Марат Ибрагьимов, “Лезги газетдин” кьилин ре­дактор Мегьамед Ибрагьимов, “Да­гъустан” ГТРК-дин лезги чIалал телерадиовещанидин старший редактор Наира Рамазанова, “Дагъус­тан” РГВК-дин художественный вещанидин редактор Гуьлера Камилова, Лезгийрин милли культурадин автономиядин Махачкъалада авай отделенидин председатель Пакизат Рагьимханова, филологиядин илимрин кандидат Султанат Аливердиева ва масабур авай.

Мярекатдин сергьятра аваз махсус комиссияди кIелунра, общественный, илимдин, спортдин хилера къазанмишнавай агалкьунар фикирда кьуна хкянавай ба­жа­рагъ­лу, яратмишдай алакьунар авай, активный студентрив пулдин премияр, дипломар ва гьуьрметдин грамотаяр вахкана. Шабагьриз (награда) лайихлу хьайибурун арада Ахцегь, Докъузпара, Дербент, Сулейман-Стальский, Мегьа­рамд­хуь­руьн, Хив, Табасаран, Агъул, Рутул­ районрай, Дагъустандин Огни шегьердай тир ва чпи ДГУ-да, ДГТУ-да, ДГПУ-да, ДГМА-да, ДГУНХ-да кIелзавай студентар авай.

Слетдал Ашукь Алихана, Арзумана, Жамиля Къафлановади, Тамила Хидировади тамамарай ма­нийри иштиракчийрин гуьгьуьлар генани шадарна.

Векил  Тархаров