Играми газет кIелзавайбур!
17-июндиз, сятдин 11-даз, Дербентда, Лезги театрдин дараматда, лезги прессадин I фестиваль кьиле фида. Мярекат РД-дин информациядин ва печатдин министерстводин куьмекдалди “Лезги газетдин” редакцияди тешкилзава.
Фестивалда Дагъустанда ва Азербайжанда лезги чIалал акъатзавай газетринни журналрин векилри иштиракда. Абурун арада “Лезги газет”, “Самур”, “КцIар”, “Ас-салам”, “Къурушрин сес”, “ЦIийи дуьнья”, “Эренлардин сес”, “Куьредин хабарар”, “Самурдин сес”, “Дагъдин булах”, “Экуь гъед” газетар, “Самур”, “Кард”, “Дагъустандин дишегьли”, “Алам” ва “Куьредин ярар” журналар ава.
Мярекатдин сергьятра аваз гьар са изданидин редакцияди газетдин ва я журналдин тарихдиз, къенин йикъаз, лезги писателрин ктабриз талукь выставкаяр, кIелзавайбурухъ галаз гуьруьшар тешкилда, алай аямдин лезги публицистикадин месэлаяр ва вилик финин рекьер веревирдда. Ибурулай гъейри, “Лезги газетдин” редакциядихъ галаз сих алакъаяр хуьзвай штатдик квачир са жерге мухбиррив РД-дин информациядин ва печатдин министерстводин патай гьуьрметдин грамотаяр, “Лезги газетди” алатай йисуз малумарай конкурсрин гъалибчийрив дипломарни пулдин пишкешар вахкуда.
«Лезги газет»
