Чна виликамаз хабар гайивал, алатай гьафтедин ял ядай йикъара Махачкъалада РДЮСШ-дин спортдин майданрал “Республикадин волейболдин югъ” фестиваль кьиле тухвана. Меркездин школайра кIелзавай аялрикай, студентрикай, министерствойринни ведомствойрин къуллугъчийрикай, волейболдин ветеранрикай ибарат тир 100-лай виниз командайрик квай волейболистри чпин устадвал къалурна. Фестивалдин макьсад Дагъустанда спортдин и жуьре мадни машгьурун, адан сергьятар гегьеншарун тир.
Фестивалдиз атанвай багьа мугьманрин арада дуьньядин волейболда чпин гел тунвай ксар — Олимпиададин къугъунрин чемпионар тир Александр Савин ва Вячеслав Зайцев, волейболдин ветеран, машгьур художник ва сиягьатчи Вячеслав Егоровни авай. Фестиваль ачухуниз талукьарнавай шад мярекатдал рахай Дагъустандин Кьил Р.Абдулатипова Дагъустанда спорт, иллаки волейбол гзаф хушди, алай вахтни республикада спортдин и жуьре патал виридалайни хъсанди тирди, пешекар командадилай са куьруь девирда уьлкведин виридалайни хъсан 24 командадин жергеда чка кьаз алакьнавайди къейдна. Ада гьакIни ДГТУ-дин командади (мукьвара и команда уьлкведин вузрин арада виридалайни хъсанди лагьай тIварцIиз лайихлу хьана), Дагъустандин волейболдин ветеранрин командади уьлкведин чемпионатра ва кубокар патал акъажунра гъалибвилер къазанмишзавайди рикIел хкана.
Мярекатдал волейболдай хейлин йисара СССР-дин хкянавай командадин капитан хьайи Вячеслав Зайцева спортдин сувар тешкилунай Дагъустандин Кьилиз, РД-дин волейболдин федерациядиз чухсагъул малумарна, дагъустанви волейболистрин тIварцIихъни хуш келимаяр лагьана.
Гуьгъуьнлай шад мярекатдал РДЮСШ-дин директор Александр Маркаровав, ветеранрин арада волейболдай Дагъустандин хкянавай командадин капитан Газияв Асхабовав ва Къизилюртдин волейболдин федерациядин президент Темирхан Темирхановав “Физкультурадин ва спортдин хиле лайихлувилерай” медалар вахкана. ДГУ-дин ректор Муртузали Рабаданов, университетдин команда — вузрин арада волейболдай Россиядин чемпионар (идалди Европадин чемпионатда иштиракдай мумкинвал къазанмишна) ва адан тренер Мегьамед Гаирбегов РД-дин Кьилин тIварцIин сятер гуналди къейдна.
Фестиваль ачухунин шад мярекатдал “Дагъустан” волейболдин командадин цIийи кьилин тренердихъ — алатай йисуз жегьилрин арада Европадин ва дуьньядин чемпион Юрий Филипповахъ галаз танишарна.
Фестиваль дуствилин къугъуналди ачухна, ам 1:1 гьисабдалди акьалтIна. Акъажунар Олимпийский къайдада (“кумукьайди хкатиз”) давам хъхьана.
Къейд авун лазим я хьи, икьван чIавалди и жуьреда фестиваль дуьньяда санани тухванвач: фестивалдин иштиракчийри са гъилди 32 майдандал чпин алакьунар къалурна, идалди дагъустанвийри цIийи рекорд эцигна. Икьван чIавалди бразилвийрихъ санлай 27 майдандал къугъунин рекорд авай.
Волейболдин фестивалда гъалиб хьайи вирибуруз кубокар, медалар ва грамотаяр гана, кьилди-кьилди гьар са командадиз РД-дин волейболдин федерациядин патай тупарни пишкешна.
Рагнеда Рамалданова
