Женгинин самбодай 2-4-мартдиз Хабаровскда кьиле фейи Россиядин чемпионатда дагъустанви пагьливанри ирид медаль къазанмишна. И гьакъиндай республикадин тренер Зайнулав Гьасанханован гафарал асаслу яз, «Дагъустан» РИА-ди хабар гузва.

«Пуд йикъан акъажунрин нетижайра, самбодал машгъул чи пагьливанри 1 къизилдин, 1 гимишдин ва 5 буьруьнждин медалар къазанмишна», — лагьана тренерди.

Вини дережадин къизилдин са шабагь 68 килограммдал кьван заланвал авайбурун арада Шейх-Мансур Гьабибулаева къачуна. И гъалибвили пагьливандиз и йисуз Бухарестда кьиле фидай дуьньядин чемпионатда иштиракдай мумкинвал гузва.

Кьвед лагьай приздин сагьиб Мухтар Гьамзаев я, ада 57 килограммдал кьван заланвал авайбурун арада женг тухвана ва Афины шегьерда кьиле фидай Европадин чемпионатдиз фидай мумкинвал къазанмишна.

Вад дагъустанвиди – Тамара Агьмедовади (+80 кг), Саид Саидова (90 кг), Султан Алиева (90 кг), Шамиль Курамегьамедова (100 кг), Паша Хархачаева (100 кг) – 3-чкаяр кьуна.

Куругъли Ферзалиев