31-майдиз Дагъустан Республикадин Кьилин везифаяр вахтуналди тамамарзавай Сергей Меликован тапшуругъдалди республикадин суьрсетдин базарра къиметар авай гьалдиз ва абур къайдадик кутуниз талукьарнавай совещание кьиле фена. Ам РД-дин Гьукуматдин Председателдин заместитель Абдулмуслим Абдулмуслимова ачухна ва кьиле тухвана.

Ада къейд авурвал, республикадин суьрсетдин базарда къиметар арадал къвезвай гьалдиз талукь яз датIана мониторингар кьиле тухузва. ИкI, малум жез­вайвал, эхиримжи гьафтеда са бязи шейэрин къиметар агъуз аватнава. Афнийрин къимет 77 манатдал,  верчерин ка­кайрин (цIудан) — 73, помидоррин — 120, чи­чIекрин — 33,29, келемрин — 32, 36 манатдал хтанва.

Гьа са вахтунда бязи шейэрин къиметар хкаж хьанва. Газаррин — 23,2, картуфрин — 1,6, семечкадин чIе­мин — 1,1 процентдин. Арадал атанвай гьалариз килигна, исполнительный гьукумдин органри недай шейэрин къиметар къайдадик кутадай са жерге серенжемар кьабулзава.

Совещанидал РД-дин хуьруьн майи­шатдин ва суьрсетдин министрдин заместитель Эмин Шейхгьасанова и месэ­ла­диз талукь яз доклад авуна. Ада хабар гайивал, хуьруьн майишатдин ва суьр­сетдин министерстводи мониторинг кьиле тухун патал датIана республикадин ба-зарра ва недай-хъвадай шейэр ма­са гузвай гипермаркетра къиметар агъуз ва хкаж жезвай гьал ахтармишзава.

Дагъустан Республикадин промышленностдин ва алишверишдин мини­стрдин сад лагьай заместитель Рашид Мур­­заева малумарайвал, шекердин ва семечкадин чIемин къимет къайдадик кутун патал са бязи серенжемар кьабулна. ИкI, республикадиз шекерни чIем гъизвай ксарин ва карханайрин сиягьар тайинарна. Ахьтинбурук 8 субъект акатзава. Абурун виликни шартI эцигнава: са литр чIемин къимет 110 манатдилай ва са килограмм шекердин къимет 46 манатдилай виниз тежен.

Малумарайвал, регионда федеральный сетар кардик квач. Республикадиз винидихъ тIварар кьунвай шейэр гъвечIи организацийри, фирмайри гъизва. Гьавиляй къиметрал гуьзчивал тухун четин акъваззава.

Агьалийри незвай-хъвазвай шейэрин къиметар цавариз акъуд тавун патал рахай ксари ихьтин теклифар гана. ДатIана къиметар хкаж жезвай шейэр гьасилзавай ва республикадиз товарар гъизвай ксариз алава субсидияр чара ийин. Республикадин шегьерра суьрсетдин къиметар агъузарун патал мукьвал-мукьвал хуьруьн майишатдин продукциядин ярмаркаяр кьиле тухун.

Абдулмуслим Абдулмуслимова къейд­на хьи, республикада бес кьадар-да­ емишар, майваяр яргъалди хуьдай има­ратар гилани авач. Ида чиниз маса чкайрай гзаф кьадарда емишар, майваяр гъуниз мажбурзава. Ада лагьайвал, эхиримжи йисара и нукьсан арадай акъу­д­ун патал серенжемар кьабулзава. Алай вахтунда республикада къайивал гу­дай тадаракралди таъминарнавай оптово-распределительный центраяр эцигзава. Ихьтин имарат Къизилюртда кардик кутунва. Къизлярда и мукьвара ишлемишиз вахкуда. Кьиблепатан Дагъус­танда эцигзавай имаратдал кIвалахар давамарзава.

«Лезги газет»