25-майдиз РД-дин Гьукуматдин Председателдин заместитель Абдулмуслим Абдулмуслимован регьбервилик кваз кьиле фейи совещанидал 2021-йисан ципицIрин бегьер кIватIунин ва гьялунин месэлаяр веревирдна.
Гуьруьшда ципицIар гьасилунал машгъул майишатрин руководителри иштиракна. Вице-премьерди къейд авурвал, республикадихъ уьзуьмчивилин хел еримлу авунин жигьетдай еке мумкинвилер ава. Къенин юкъуз республикада уьзуьмлухрин умуми майдан 26,3 агъзур гектардиз барабар я, гьа жергедай яз — 21,2 агъзур гектарда цанвай уьзуьмлухар бегьердал атанвайбур.
РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова хабар гайивал, алатай йисуз республикадин уьзуьмчийри 208,9 агъзур тонн бегьер вахчуна (са гектардай 98,5 центнер). Им эхиримжи 30 йисан вахтунда садрани тахьай кьадар я. Идалайни гъейри, кIватIнавай бегьердин гьакъикъи кьадардал (валовый сбор) гьалтайла, Краснодардин крайдилай 260 тонндин гзаф бегьер вахчуналди, Дагъустан сад лагьай чкадал акъатнава. ЦIийиз цазвай майданрал гьалтайлани, Дагъустан сифте чкадал ала. Алай йисуз 1400 гектарда чубукар кутун планламишнава. Гьелелиг и кIвалах 517 гектарда авунва.
Ш.Шарипован гафаралди, са йис идалай вилик кIватIай 208 агъзур тонндикай 145 агъзур тонн, (яни тахминан 70 процент) ципицIар гьялнай. 5 йис идалай вилик и делил 50 процентдиз, гьялзавай ципицIрик квай шекердин кьадарни 18 % барабар тир. 5 йис идалай вилик ада 15% тешкилзавай, яни уьзуьмчийри ракъинин кагьрабаяр гьасилунин карда алай аямдин технологийриз фикир гуз башламишнава.
«Лезги газет»
