25-майдиз РД-дин Гьукуматдин Председателдин Сад лагьай заместитель Батыр Эмееван регьбервилик кваз эцигунрин хиле машгъул тир сад лагьай разряддин рабочийдин мажиб гьисабунин къайда, гьакIни эцигунрин ресурсрин (эцигунардай материалрин, машинрин, тадаракрин ва икI мад) къиметар ахтармишунин нетижаяр веревирдна.
Совещанида РД-дин эцигунрин, юстициядин министерствойрин, РД-дин “Дагсельхозстрой” ГКУ-дин, гьукуматдин капитальный эцигунрин управленидин, “Проектрин государстводин экспертиза” ГКУ-дин векилри иштиракна.
РД-дин “Эцигунрин хиле къиметар тешкилунин рекьяй Дагъустан Республикадин региондин центр” ГКУ-дин директордин везифаяр тамамарзавай Иса Мегьамедова регионда ракьун тадаракрин къиметар хкаж хьуниз талукь яз кьиле тухванвай ахтармишунрин нетижайрикай хабар гана.
“Ракьун продукциядин къиметар 2020-йисан 3-кварталдилай къенин йикъалди 100-120 процентдин хкаж хьанва. Эцигунриз ийизвай харжийра ракьун тадаракри кьунвай чка екеди я. Гьаниз килигна, ракьун къиметар хкаж хьуни объектдин къиметар хкаж хьунал гъизва. И жигьетдай государстводин ва муниципальный контрактрай кIвалахар тамамарзавай компанияр четин шартIара гьатда, гьикI лагьайтIа, абурун къиметар тайинарнавайбур я ва дегишариз жедач. Эцигунрин кIвалахрин багьавал сметадин къиметдин жигьетдай эвезун мумкин туш, гьикI лагьайтIа, сметадин къазанжи государстводи тайинарзавайди я ва, адет тирвал, ада эцигунрин кIвалахрин умуми къиметдин тахминан 8 процент тешкилзава. Ракьун конструкцийрин къиметар багьа хьуни лагьайтIа, объектдин къимет санлай 14-15 процентдин багьа хьунал гъизва. Идалайни гъейри, Дагъустан залзалайрин жигьетдай хаталу чка тирвиляй ина эцигзавай объектра алава кьадар арматура ишлемишзава. Ракьун къиметар багьа хьуни гзаф кьадар пудратчияр зарар хьунал гъун мумкин я”, — лагьана ада.
Гуьруьшдин иштиракчийри рабочий къуватдин къиметарни багьа хьанвайди къейдна.
Федеральный ва республикадин госпрограммайрик квай объектар эцигунин кIвалах хаталувилик кутун тавун патал сад лагьай вице-премьерди Россиядин Главгосэкспертизадиз сметадин къиметар дегиш хьуниз талукь индексар гьисабунин тавакъу рекье тун теклифнава.
Капитальный эцигунрин управленидал эцигунрин хиле машгъул тир сад лагьай разряддин рабочийдин вацран юкьван мажибдин гьакъиндай къарардин проект гьазурун тапшурмишнава.
«Лезги газет»
