Мукьвара “Лезги газетдин” редакциядив ФЛНКА-дин Советдин член, ХМАО-Юграда кьиле тухузвай кIвалахра РФ-дин Госдумадин депутат Н.Н.Езерскийдин куьмекчи, КПРФ-дин Покачи шегьерда авай комитетдин сад лагьай секретарь, вичин ери-бине Мегьарамдхуьруьн райондай тир Жалаудин Абдуразакьовалай чар агакьна. Вичин чарче авторди РФ-дин Федеральный Собранидин сенатор Сулейман Керимовавай Мегьарамдхуьруьн райондин Гъепцегьрин хуьре школа-интернат эцигун тIалабзава.
“Гьуьрметлу Сулейман Абусаидович! Чна, Дагъустандин жуьреба-жуьре миллетрикай ибарат халкьди, Квел лайихлудаказ дамахзава. Куьне Урусат ва хайиди тир Дагъустан Республика яшайишдин рекьерай вилик фин патал гзаф крар кьилиз акъудзава…
Заз квевай са месэладин патахъай тIалабиз кIанзава. Кьиблепатан Дагъустанда чпихъ жуьреба-жуьре рекьерай агалкьунар авай жегьилар чIехи жезва, абуру республикадин, уьлкведин дережада аваз тешкилзавай конкурсра, олимпиадайра кIвенкIвечи чкаяр кьазва. Гьайиф хьи, пулдин такьатар бес тежезвайвиляй абурукай гзафбуруз чпин алакьунар мадни чIехи дережайра раиждай мумкинвал жезвач…
Эгер куьне Кьиблепатан Дагъустандин хуьрерин чпихъ кьетIен алакьунар, бажарагъ авай аялар патал Мегьарамдхуьруьн райондин Гъепцегьрин хуьре школа-интернат эцигнайтIа, хъсан кар жедай. Инаг Лезгистандин вири хуьрер патал кутугай чка я.
Заз малум тирвал, куь такьатрихъ Подмосковьеда вижевай мектеб эцигнава. Куьне кьиблепатан Дагъустандизни ихьтин савкьат багъишнайтIа, халкьдин патай Квез гьуьрмет мадни артух жедай…”, — кхьенва Ж.Абдуразакьован чарче.
«Лезги газет»
