Дагъустан Республикадин Гьукуматдин Председатель Абдулпатагь Амирханов алатай гьафтедин жуьмядиз Гуниб райондин Согратль, Чох, Гуниб, Кудали ва Салта хуьрериз фена. Кудали хуьре гьукуматдин делегацияди участокдин больницадал, культурадин кIвалел кьил чIугуна ва рекьиз килигна.
Хуьруьн больница 1955-йисуз эцигнавай куьгьне дараматда ава. Ам садрани капитальнидаказ ремонтнавач. Алай вахтунда медицинадин идаради вад хуьруьн агьалийриз къуллугъзава. Больницадин чIехибуру ва коллективди хуьре медицинадин алай аямдин дарамат эцигун тIалабзава.
Культурадин кIвалин дараматдални тарифдай гьал алач. Ина полар аватзава, мебель лап куьгьнеди я, цлар, къаварни ремонтна кIанзава.
Салта хуьре РД-дин Гьукуматдин Председатель М.Рамазанован тIварунихъ галай юкьван школадиз ва амбулаториядиз фена. 1978-йисуз ишлемишиз вахканвай амбулатория целди таъминарнавач. Больницадин руководстводи лагьайвал, коллективдиз алай вахтунин истемишунрив кьадайвал кIвалахун патал цIийи тадаракар герек я, гьа гьисабдай яз — стоматологиядинбур, тади куьмекдин пуд автомашин, аялрин ИВЛ — аппаратар.
Райондиз фин умуми совещание тухуналди ва вилериз акур крарин нетижаяр кьуналди акьалтIна. Гуниб райондин вилик акъвазнавай яшайишдинни экономикадин важиблу месэлаяр гьялунин гьакъиндай талукь гьар са министерстводиз тапшуругъар гана. Сифте нубатда — яшайишдин объектар эцигунин ва цIийикIа туькIуьр хъувунин жигьетдай.
Абдулпатагь Амирханова къейд авурвал, районриз финин макьсад республикадин гьукуматди гьялна кIанзавай месэлайрихъ галаз алакъалу крар тайинарун я. И карда чкадин агьалийрин фикирар, тIалабунар чирунихъни еке метлеб ава.
РикIел хкин хьи, са варз кьван вилик квай йикъара РД-дин Гьукуматдин Председатель Дахадаев, Къарабудахкент, Докъузпара, Акуша, Унцукуль, Шамил районриз фенай.
«Лезги газет»
