25-майдиз Дагъустандин Кьилин везифаяр вахтуналди тамамарзавай Сергей Меликован регьбервилик кваз регионда туризм вилик тухуниз талукь месэладай совещание кьиле фена. Идан гьакъиндай “Лезги газетдиз” республикадин Кьилин пресс-къуллугъди хабар гана.
Кьилди къачуртIа, властрин органрин регьберрихъ ва республикадин туриствилин бизнесдин векилрихъ галаз и хиле къенин юкъуз авай гьал ва адан гележег веревирдна. Кьилдин тема — им халкьарин художественный сеняткарвилер вилик тухунин гележегдин мумкинвилериз ва туристрин асул рекьер физвай чкайра культурадин объектар авай гьалдиз талукьди тир.
“2021-йисан туриствилин вахт (сезон) башламиш хьанва ва майдин суваррин йикъари къалурайвал, гатун отпускайрин ва аялрин каникулрин вахтар алукьуналди республикадиз къвезвай туристрин кьадар тIимил жезвач”, — лагьана региондин Кьили ва муниципалитетрин регьберриз чкайрал тайин хилерай туризм вилик тухудай гьихьтин мумкинвилер аватIа лугьун теклифна.
Республикадиз къвезвай туристрин кьадар гзаф жезвайди къейд авуналди, Сергей Меликова хиве кьуна хьи, ихьтин гьалди шадар тавуна тазвач. “Гьа ихьтин гьалар заз гележегдани хьана кIанзава, герек инсанар республикадин лишанлу чкайриз, гьа гьисабдай яз дагълух районрин инсанрин кIвач хкIун тавунвай тIебиат авай чкайриз фин, муькуь патахъай, туристрин кьадар гзаф хьуни чун и кардиз гьикI гьазур хьанва лугьудай суални арадал гъизва”, — лагьана Сергей Меликова совещанидин иштиракчийриз. Ада гьакIни, аэропортунилай эгечIна, транспортдин хелни вилик тухунин, туристар санай масаниз фидайла, абурун хатасузвал таъминарунин чарасузвал авайдини къейдна.
“Чахъ машинар акъвазардай, вирида ишлемишдай чкаяр авач. Туристар акъваздай ва тIуьнар недай чкайрихъ галаз алакъалу месэлаяр гьялун чарасуз я. Туристар патал къулай шартIар тешкилунин такьатар жагъуриз ва гьасилай пул проект вилик тухун патал ишлемишиз жедачни? Ихьтин шартIар авачир къурулушди туристар хаталувилик кутада”, — къейдна региондин Кьили.
Гьа са вахтунда Сергей Меликова инсанрин хатасузвал, тIебиатдиз зарар тагунни рикIелай алуд тавуниз эвер гана. Чун элкъуьрна кьунвай тIебиат, гьайванрин алем, тIебиатдин ресурсар хуьниз талукь яз Сергей Меликова къенин юкъузни законсуздаказ къум тухузвай тIебиатдин заповедник Сарыкъум бархан мисал яз гъана. Гьуьлуьн къумни законсуздаказ тухуни республикадиз зарар гузва.
Республикада алай аямдин туриствилин комплекс арадал гъуникай рахадайла, региондин Кьил туриствилин 5 кластер — Сулакдин дагьар, Дербент шегьер, Каспий гьуьлуьн кьер, Ачиколдин вирер ва дагълух районар — арадал гъунин месэладал мад сефер акъвазна.
“За гьамиша лугьузвайди я хьи, Дагъустан Кеферпатан Кавказда маса субъектрилай девлетлу я. Вучиз лагьайтIа, ина Кеферпатан Кавказда авай вири, артухлама яз гьуьлни ава. Амма гьуьлуьн кьер чина гьеле къулайдаказ туькIуьрнавач”, къейдна Сергей Меликова.
Къейднавай вад кластердилай гъейри, региондин Кьилин фикирдалди, муниципалитетра чIехи проектрик квачир хъсан майданар мадни тIимил авач, гьабурни вилик тухвана кIанда. Месела, — реконструкция хъувуна кIанзавай Воронцован подвалар ва туристри итиж ийизвай тарихдинни культурадин гзаф маса памятникар.
«Лезги газет»
