Дагъустандин здравоохраненидин министерстводин делилралди, республикада коронавирус акатзавайбурун кьадар гзаф жезва. Мисал яз, алатай гьафтедин жуьмя юкъуз духтурханайрив агакьарайбурун кьадар 100-далай алатна. Им февралдин вацралай инихъ са йикъан къене и кьадар инсанар начагъ хьанвай сад лагьай дуьшуьш я.
Алай вахтунда и рекъем агъуз ахватнава. 26-майдин делилралди, республикада са йикъан къене 37 касдик коронавирус акатнава.
Са гафуналди, тIугъвал зайиф хьанвач. Вири уьлкведа хьиз, Дагъустандани адан вилик пад кьун патал гзаф кьадар серенжемар кьабулзава. РД-дин здравоохраненидин министр Татьяна Беляевадин гафаралди, агьалийри духтурри гузвай меслятрал амал авунихъ еке метлеб ава.
И фендигар тIегъуьндал тамамдаказ гъалибвал къачудай са рехъ ава: адаз акси раб ягъун. И месэладив жавабдарвилелди эгечIунилай чакай гьар садан сагъламвал аслу я.
Къейд ийин хьи, къенин юкъуз Дагъустанда коронавирусдиз акси рапар янавайбурун кьадар 90 агъзурдалай алатнава.
«Лезги газет»
