Алатай гьафтеда Москвадиз фейи Да­гъустан Республикадин Кьилин везифаяр вахтуналди тамамарзавай Сергей Меликова са шумуд гуьруьш кьиле тухвана. Гуьруьшрикай сада ам Н.Лопаткинан тIварунихъ галай урологиядин ва интервенционный радиологиядин НИИ-дин кIвалахдихъ галаз таниш хьана. И гуьруьшда РД-дин здравоохраненидин министр Татьяна Беляевади ва республикадин медицинадин са жерге идарайрин руководителрини иштиракна.

Региондин Кьил НИИ-дин ачухзавай отделенийриз килигна. ГьакI ам поликлиникадиз, физиодиагностикадин кабинетдиз, уродинамикадин ва видеоуродинамикадин лабораториядиз, патоморфологиядин ва генетикадин лабораториядиз, МРТ-дин кабинетдиз фена. Республикадин руководителдиз клиникадин корпусар, адетдин палатаяр, урологиядин отделение, опе­рацияр ийизвай чкаяр ва аялрин отделение къалурна.

Сергей Меликова медицинадин идарада чпин сагъламвал чкадал хкизвай да­гъустанвийрални кьил чIугуна ва абуру­вай гьал-агьвал хабар кьуна. Начагъ инсанри къейд авурвал, абур ина чпиз ийизвай медицинадин вири къуллугърилай пара рази я. Сергей Меликова институтда кIвалахзавай дагъустанвияр тир ординаторрихъ галазни суьгьбетар авуна. Гьа юкъуз урологиядин НИИ-дин ва республикадин урологиядин центрадин арада телемостни кьиле фена.  Ихьтин форматда аваз Москвадинни Дагъустандин урологри сад лагьай сеферда рафтарвална. ГьикI лагьайтIа, тIугъвалдин вахтунда республикадин урологиядин центрада коронавирусдик начагъбур сагъар хъийизвай.  Идал къведалди дагъустанвийри Москвадин пешекарривай вацра кьвед-пуд сеферда меслятар къачузвай.

Республикадин Кьил “НМИЦ радиологии” ФГБУ-дин, П.А.Герценан тIварунихъ галай МНИОИ-дин директор, Россиядин Минздравдин штатдик квачир кьилин онколог Андрей Капринахъ ва Н.Лопаткинан тIварунихъ галай урологиядин ва интервенционный радиологиядин НИИ-дин директор Олег Аполихинахъ галаз гуьруьш­миш хьана. Абуру гележегда санал кIва­ла­хуникай веревирдер, урологиядин центраяр медицинадин кадрийралди, алимралди таъминарунин, уьлкведин технологияр гегьеншарунин, сагъардай цIийи къайдайрикай менфят къачунин месэлайрикай метлеблу ихтилатар авуна.

НИИ 1979-йисуз арадал гъайиди я. Ам  Россиядин здравоохраненидин минис­терстводин “НМИЦ радиологии” ФГБУ- дин къурулушдик филиал хьиз акатзава. Дуьньядин майданда онкологиядик начагъбур гзаф жезвай вахтунда Россияда ихьтин онкокластер кардик кутун вахтунихъ галаз кьазвай месэла я.  Сад авунвай­ центрада 3 агъзурдалай виниз ксари зегьмет чIугвазва. Духтурри гьар йисуз 16 агъзур операция ийизва. ДатIана цIийи  препаратар ва методикаяр ишлемишзава, йиса 3 миллиондилай виниз ахтармишунар кьиле тухузва.

Алай вахтунда институт урологиядин ва андрологиядин рекьяй Россиядин илимдинни ахтармишунардай кьилин идара яз гьисабзава. Ада илимдин ахтармишунар комплекснидаказ кьиле тухунал, медицинадин рекьяй пешекарвилин куьмек гунал гуьзчивалзава. Ина урологиядин, онкоурологиядин, эндоурологиядин, нейроурологиядин ва аялрин урологиядин рекьяй гегьенш крар ийизва, кIеве авайбурун дуркIунар дегишарзава.

Москвада авай вахтунда Сергей Меликова Россиядин просвещенидин министр Сергей Кравцовахъ галаз Дагъустанда образованидин къурулуш вилик тухуникайни ихтилатар авуна.

Ахпа региондин Кьил “Просвещение” издательстводин выставкадиз тамашна ва и компаниядин  президент Владимир Узуновахъ галаз гуьруьшмиш хьана.  Ктабрин и издательстводиз девлетлу ва нурлу тарих ава. Къе ада акъудзавай продук­циядикай Россиядин образованидин организацийри, педагогри ва ученикри менфят къачузва. Гьа са вахтунда  инновациядин  технологияр ишлемишуналди аялриз чирвилер гудай алай аямдин методикаяр арадал гъизва.

Вичиз акур крариз къимет гуналди, Сер­гей Меликова къейдна: “Школайрин ва бахчайрин идарайра авай аялрин чирвилер артухариз куьмек гудай “Гележегдин школа” проект зун патал хъсан чешнедиз элкъвена. КIвалахда мультимедийный, вир­туальный ва алава материалар 3D-тех­нологияр, робототехника ишлемишуни­ аялриз муракаб хабаррикай менфят къачунин карда куьмек гузва. Абур гзаф мес­элайрин гъавурда регьятдиз акьада. Чаз Дагъустанда образованидин къурулуш диб­дай дегишариз кIанзава. Гьавиляй винидихъ лагьанвай проект чи республикадани уьмуьрдиз кечирмишда. Гьелбетда, и хиле авай вири месэлаяр са юкъуз гьялиз жедач. Къведай йисан бюджет тайинардайла, чна и месэлаяр фикирда кьада.­

Чи кьилин везифа гележегдин несил тербияламишун я. ГьикI хьи, адан гъиле Да­­гъустандин кьисмет ава. Бахчадилай га­тIунна, аял чирвилерин жигьетдай виликди фин лазим я. Гьавиляй абуруз тербия, чирвилер гудай педагогар, тербиячияр гьазурунни важиблу месэлайрик акатзава. Идан гьакъиндай Россиядин просвещенидин министрни чи гъавурда акьазва ва чаз алай аямди истемишзавай кIвалах тешкилун патал ада куьмекни гуда. Умудлу я, чалай и кIвалах алакьда”.

«Лезги газет»