“Чи ватанэгьлияр — гьар сана” рубрикадин сергьятра аваз и сеферда чна газет кIелзавайбур лезги халкьдин тарихда кьетIен гел тунвай баркаллу рухвайрикай сад тир рагьметлу генерал Муьгьуьдин Къагьриманован хцихъ галаз танишарзава.
Москвадин Ломоносован тIварунихъ галай университет акьалтIарай Агьмед Муьгьуьдинович Къагьриманов алай вахтунда уьлкведин меркезда гзафбуруз сейли инсан я. Ада СНГ-дин финансринни банкарин Советдин генеральный директордин заместитель, РФ-дин Президентдин патав гвай Россиядин хуьруьн майишатдин ва государстводин къуллугъдин академиядин госкъуллугъдинни управленидин институтда парламентаризмдин ва парламентарийрин алакъайрин кафедрадин доцент яз кIвалахзава. Ада сиясатдин илимрин рекьяй кандидатвилин диссертацияни агалкьунралди хвенва. Алимдин къелемдикай сиясатдиз, международный алакъайриз, жуьреба-жуьре уьлквейра сиясатдин рекьяй кьиле физвай вакъиайриз талукьарнавай илимдин цIудралди макъалаяр хкатнава.
Са шумуд йис идалай вилик чи бажарагълу ватнэгьлиди “Евразиядин транспортдин дегьлиз” (“Евразийский транспортный коридор” ООО арадал гъана. И холдингдин кьилин макьсад транспортдин инфраструктура еримлу авун, и хилез жезмай кьван гзаф инвестицияр желб авун ва СНГ-дик акатзавай уьлквейрин мулкарилай тухузвай транзитдин грузооборот артухарун я. Агьмед Къагьриманова регьбервал гузвай карханадихъ галаз жуьреба-жуьре уьлквейра авай логистикадин, транспортдин цIудралди компанийри алакъаяр хуьзва. Мукьвал тир девирда холдингдихъ Евразиядин транспортдин дегьлизар еримлу авун патал 1 млрд. доллардиз барабар инвестицияр желбдай ниятар ава.
“Евразиядин транспортдин дегьлиз” ООО арадал гъуникай Агьмед Къагьриманова “Время инноваций” журналдиз ганвай интервьюда къейдзава: “И проект кьилиз акъудун СНГ-дин финансринни банкарин Советдин ва холдингдин акционеррин вилик акъвазнавай месэлаяр гьялун лагьай чIал я. Алай вахтунда финансринни банкарин Советдик СНГ-дин уьлквейрин чIехи 17 банк акатзава. Абурухъ итижлу ва менфятлу проектар кьилиз акъуддай ниятар ава. Холдинг арадал гъуналди чаз транспортдин хиле авай мумкинвилер артухариз, СНГ-дин уьлквейрай инвестицияр желб ийиз кIанзава…”.
Сиясатдин илимдал, международный алакъайрал машгъул жезвай пешекарар чахъ са акьван гзаф авач. Абурукай сад Агьмед Къагьриманов я. Кьегьал бубадин кьегьал хцихъ кIвалахдин рекье мадни еке агалкьунар хьун чи мурад я.
Гьазурайди — Агьмед Магьмудов
