Са дишегьли девлетар авай савдагардиз гъуьлуьз фена. Адахъ парчаяр, парталар маса гузвай еке туьквен авай. Амма вич гзаф мутI­лакь итим тир.

Йикъарикай са юкъуз ада базардай верч маса къачуна ва папал ня­нихъ дадлу хуьрек гьазурун тапшур­мишна. Фу незвай чIавуз садла­гьа­на кIвалин рак гатана. Рак ачухай­ савда­­гардиз анихъ галай са кьас фу тIа­лаб­завай къекъвераг акуна. Девлетлуда гишила авай кесибдиз тIуьн тагун анихъ амукьрай, адаз гьараяр­на, вилерикай квахьун буйругъна. Ам­­­­ма тIалабчи алай чкадилай юза­нач­.

— Эгер захъ игьтияж авачиртIа, за ви кIвалин рак гатадачир, чIехи­ди, заз са кьас фу це, — лагьана ада.

Савдагарди рахунар давамарнач, ам,  рак ахгална, кIвализ гьахь хъувуна, хуьрек тIуьн давамарна.

— Вучиз вуна кесибдин вилик рак ахгална? – хабар кьуна папа.

— Ваз за вуч авуна кIанзавай? — хъел кваз суалдиз суалдалди жаваб хгана итимди.

— И вечрен са пай, гьич тахьай­тIа, адан каш кьин патал кьве лув  кьванни ганайтIа жедачирни? — алава хъувуна папа.

Итимдиз лап хъел атана:

— Вечрен са пай гун?.. Вун  дили хьанвани?

— Са затIни гуз кIан хьаначтIа, кесибдиз са хъсан гаф кьванни лугьуз жедай хьи, — гьайиф чIугуналди лагьана папа…

ГьикI ятIани,  са сеферда савдагардин туьквен, цIай кьуна, кана. Са затIни амукьнач: я парчаяр, я парталар. Сефилдиз кIвализ хтай итимди хьанвай дуьшуьшдикай па­паз лагьана.

— Гьайифар чIугвамир. Аллагьдин кьадардал рази хьана кIанда. Къуй Халикьди и агьвалат чIехи  бе­ре­катралди эвезрай, — алхишна папа.

Вичин папан ихтилатрикай са артух гьяз татай итимди лагьана:

— Жуван бубад кIвализ хъвач. Вуна лугьузвай берекатар къведалди, захъ вун хуьдай мумкинвал авач.

Гьа икI, абур чара хьана.

Са кьадар вахтар алатайла, Ал­лагьдин регьимдалди и дишегьлидал къени са итим гьалт хъувуна­, абур эвленмиш хьана. Итим гзаф заха, гишинбуруз тIуьн гудай, дарда авайдаз куьмекдин гъил яргъи ийидай инсан тир.

Йикъарикай са юкъуз фу незвай арада сада абурун кIвалин рак гатана.

— Алад, паб, ам вуж ятIа килиг, — лагьана итимди.

— Рак ачухна, хтай папа фу тIа­лаб­завай са къекъвераг атанвайдакай хабар гана.

Итимди папаз чранвай верче­рикай сад гьадаз гун буйругъна. “Чи хи­зандиз гьа имни бес я. Чаз Аллагьди ганва, тIалабзавайбуруз чна­ни гана кIанда”, — лагьана ада.

— Валай мергьяматлуди, захади авач жеди, — тарифна папа вичин итимдин.

Къекъверагдив верч вахкана хтай папан вилерал накъвар алай. И кар итимдини кьатIана. Ада жузуна:

— Я паб, вун вучиз шехьзава?

— Зун чIехи дерт авайвиляй шехьзава, — жаваб хгана ада.

— А дердинин себеб вуч я?

— Фу тIалабиз чи рак гатайди зи сад лагьай итим тир! — хабар гана папа.

Ада вичин сад лагьай итимди ракIарихъ атай тIалабчи затIни тагана рахкурайди, ам гзаф мискьиди тирдакай лагьана.

Итимди хгай жавабди и дишегьли тажубарнай:

— Чан зи паб, эгер чи рак гатай къекъвераг ви сад лагьай итим тир­тIа,  и зун са вахтунда ада, затIни та­га­на, чукурай тIалабчи тир…

Бе-ес, и дуьньяда тежер кар авайди туш. Кьилинди — инсанвал са чIавузни квадарна кIандач.

Гьазурайди — Куругъли Ферзалиев