Белиж поселокдин 2-нумрадин шко­лада аскервиле къуллугъдайла телеф хьайи  Тагьиров ­Та­­ир Гьа­­сановичаз­ ме­­мориалдин кьул ачух­завай мярекат кьи­ле фена.

Ана РД-дин Кьилин патай тамам ихтиярар ганвай векил ­Энрик Муслимова, Дербент райондин кьил Ме­гьамед Желилова, адан заместитель Садир Эмир­гьам­заева Дербент, Дагъустандин Огни шегьеррин ва Дербент райондин военный комиссар Адил  Къулиева, Белиж поселокдин кьил Рамиз Гьабибулаева, посе­локдин­­ школайра кlелзавай аялри, муаллимри, иштиракна.

Мярекат Ватан хуьдайла телеф хьайибур рикlел хкунин лишан яз са декьикьада кисна акъвазайдалай гуьгъуьниз башламишна.

Мярекат М.Желилова ачухна. Ада вичин рахунра Таир Тагьирова чандилайни гъил къачуна  аскервилин пак буржи тамамарайди ва адан кьегьалвал къейдна.

— Телефвилерикай рахадайла, рикlиз тlар жеда, ам­ма уьмуьрдай жегьилар фидайла, а тIал мадни кьве се­ферда артух  жеда — да­вамарна ада. — Къе чна и школа­да кlелай Т.Тагьирован вилик кьи­лер агъуззава ва Белиж­ поселокдин баркаллу хва мидаим ри­кlел хуьнин лишан­ яз школадин гьаятда мемориалдин кьул ачухза­ва.

Тагьиров Таир 1978-йисан 12-октябрдиз Туркменистан ССР-дин Челекен шегьерда дидедиз хьана. Ада Белиж поселокдин 3 ва 2-нумрайрин школайра, Белиждин 8-нумрадин СПТУ-да кlелна. 1998-йисан июндиз  ада РФ-дин  Яракьлу Къуватра къуллугъиз башламишна. 1999-йисан августдилай ада Чечен Республикада кьиле фейи терроризмдиз акси серенжемра иштиракна. 1999-йисан 9-октябрдиз ам телеф хьана. Младший сержант Белиж поселокда кучукнава. Кьейидалай кьулухъ адаз Жуьрэтлувилин орден  гана.

Мярекатдал Э.Муслимов, А.Къулиев, Р. Гьабибу­лаев, рай­ондин депутатрин Собранидин председатель М.Семедов рахана ва мемориалдин кьул ачухна анал цуьквер эцигна.

Къагьриман Ибрагьимов