Алай йисан 15-февралдиз Кьурагь райондин Бугъдатепе хуьре кьуьчхуьрви Абдулкериман викIегь хва, Ватандин тапшуругъдалди вичин интернациональный буржи тамамардайла, Афгъанистанда игитвилелди телеф хьайи младший сержант, мотострелковый взводдин командирдин заместитель Жалал Ражабоваз мемориалдин кьул ачухуниз талукьарнавай митинг кьиле фена.
Йикъан сятдин цIудаз юкьван школадин вилик Жалалан мукьва-кьилияр, хуьруьн жемят, школадин аялар, муаллимар, патарив гвай хуьрерин жемятрин векилар кIватI хьанвай.
Мярекат Кьуьчхуьррин юкьван школадин 8-классда кIелзавай Жамал Жабраиловани Маина Алдеровади кьиле тухвана. Абуру сифте Советрин аскеррин кьегьалвилериз талукьарнавай эсерар тамамарна. Игитвилин чешнеяр къалурай кьегьалрин арада чпин хуьруьнви Жалал Ражабовни хьунал школадин аялри дамахзавайдакай, чебни халис ватанпересар жедайдакай лагьана.
Ражабов Жалал Абдулкеримович 1964-йисан 8-майдиз Кьуьчхуьррин хуьре дидедиз хьана. Школа куьтягьайла, 1984-йисан 8-майдиз Советрин Армиядин жергейра къуллугъиз рекье гьатна. 1984-йисан ноябрдилай Жалал Афгъанистандиз акъатна. Ада са шумуд сеферда душманрихъ галаз кьиле фейи къизгъин гьерекатра иштиракна, кьегьалвал, дирибашвал къалурна. 1985-йисан 8-июлдиз кьиле фейи къати женгина ам игитвилелди телеф хьана. Къалурай кьегьалвилерай, Жалал (кьейидалай кьулухъ) Яру Гъед ордендиз лайихлу хьана. Ам Кетин дагъдин ценев гвай Кьуьчхуьррин хуьруьн сурара кучукнава.
Мярекатдал рахай Кеферпатан Кавказда бандитрин кIеретIрихъ галаз кьиле фейи женгерин иштиракчи хьайи Кьурагь райондин администрациядин кьилин заместитель Жаврудин Халикьова райондин кьил Замир Азизован ва вичин патай икI лагьана: “Жалалан анжах 22 йис тир. Ам дидеди игитвал ийиз хайиди хьиз я заз. Ада виридаз марифатдин, къанажагълувилин ва ватанпересвилин еке чешмедин тарс гана. А тарс чна садрани рикIелай ракъурдач”.
“Жалал Советрин Армиядин жергейриз рекье тур югъ зи рикIе къе хьиз алама. Ам чанда жигер авай, викIегь, намуслу къени жегьилрикай сад тир, Армиядин жергейриз вичин хушуналди шаддаказ физвайтIани, ада вичин бубадал, хизандал акьалтдай четинвилерикайни дарвилерикай фикирзавай. Къагьриман хва чи рикIера эбеди яз амукьда”, — лагьана зегьметдин ветеран Хидирнаби Исрафилова.
Жалала кIелай классдин руководитель, Дагъустан Республикадин лайихлу муаллим Межид Рамазанова вичин ученикдикай, адан диде-бубадикай, вири тухумдикай метлеблу ихтилатарна.
Митингдал куьче афгъанвидин тIварцIихъ ягъун Кумухърин хуьруьн муниципальный тешкилатдин кьил Руслан Улубегова, педагогвилин зегьметдин ветеран Нажмудин Рамазанов, “сельсовет Кочхюрский” муниципалитетдин кьил Аскер Жабраилова, райондин дяведин, зегьметдин, Яракьлу Къуватрин ва къанун-къайда хуьдай органрин ветеранринни агъсакъалрин Советдин председатель Фахрудин Мирзоева тебрикна.
Кьуьчхуьррин юкьван школада кIелзавай Мегьри Исрафиловади, Жаруллагь Фейзуллаева, Жалалан хтул Иладади афгъанвийрин игитвилериз бахшнавай ватанпересвилин шиирар везиндалди кIелна, искусстводин рекьяй чпин алакьунур къалурна.
Гуьгъуьнлай Нажмудин ва Межид Рамазановри Кьуьчхуьррин юкьван школадин цла тунвай, кьегьал хва Жалалаз бахшнавай мемориалдин кьул ачухна, куьчедизни Ражабов Жалалан тIвар ганва лагьай хуьруьн депутатрин собранидин къарардихъ галаз танишарна.
Жалалан стхаяр тир Бахтияр ва Эйнуллагь Ражабоври хуьруьнвийриз ва атанвай мугьманриз, Кьурагь райондин руководстводиз сагърай лагьана.
Фахрудин Мирзоев
