“Коррупциядиз акси михьун” Дагъус­танда фадлай башламиш хьана кIанза­вайди тир, гьисабзава РФ-дин Президентдин патав гвай  граждан общество вилик тухунин ва инсандин ихтияррин рекьяй Советдин (СПЧ) председатель Михаил Федотова.

Виликдай ада малумарнай хьи,  20-22-февралдиз Дагъустанда СПЧ-дин заседание кьиле тухуда. И кар Федотова республикада “коррупциядиз акси ми­хьун”­ кьиле тухуз башламишунихъ ва Да­гъустандин руководстводиз кIватI хьанвай месэлаяр гьялунин карда СПЧ-диз куьмек гудай  ният авайвилихъ галаз ала­къалу авунай. Советдин членри агьалияр кьабулда, приемная ачухда (неинки республикадин меркез Махачкъалада), Федотов са жерге идарайризни фида.

“Чун иниз республикадиз ина ихьтин дегишвилер кьиле физвайла, анин кьил дегиш хьанвайла “коррупциядиз акси ми­хьун” кьиле физвай рахунар ийиз, куьмек гуз атанва. За фикирзава хьи, и кар фад башламишна кIанзавайди тир, амма — гьихь­тин такьатралди — им ма­са кар я”, — ла­гьана Федотова Махачкъалада республикадин журналистрихъ галаз кьиле фейи гуь­руьш­да­.

СПЧ-дин кьилин гафаралди, республикадин властри кьиле тухузвай “коррупциядиз акси михьун” 100 агъзурралди инсанрин итижар хуьнихъ элкъуьрнава. Ада къейдна хьи, вири кIвалахар закондал асаслу яз кьиле фин лазим я. Федотован гафаралди, республикадин агьалияр кьиле физвай крарин гъавурда хьана кIанда. “И кардани журналистрин роль лап екеди я”, — алава хъувуна ада. Гуьруьшмиш жедалди вилик кIватI хьанвайбуру Къизлярда  ибадатханадал гьужум авунин нетижада телеф хьайибур, кисна акъвазуналди, рикIел хкана.

Чи мухбир