Дагъустандин Пенсийрин фондуни мадни рикIел хкизвайвал, хизанриз куьмек гузвай программа 2026-йисалди давамарнава, яни дидевилин (хизандин) капитал къачудай ихтияр гузвай аял 2026-йисан 31-декабрдалди хун ва я хвавиле, рушвиле кьабулун герек я.
Дидевилин капиталдин кьадар ара-ара хкажзава (индексация), 2021-йисалай 3,7 процентдин артух хьанва. Виликан йисав гекъигайла, адан кьадар 17,3 агъзур манатдин хкажнава ва алай вахтунда 483 881, 83 манат тешкилзава. И кьадарда аваз маткапитал 2020-йисалай сад лагьай аял ханвай, гьакIни 2020-йисан 1-январдалди сертификат къачунвай, амма адан такьатар ишлемиш тавунвай хизанриз гузва.
Мадни хизанда кьвед лагьай аял хьайила гузвай пулунин кьадарни артух хьанва. 2021-йисуз и пулунин кьадарди 155 550 манат тешкилзава.
Эгер сад лагьай аял 2020-йисалди ханватIа, кьвед лагьайдини алай йисуз дуьньядал атанватIа, ахьтин хизанар патал дидевилин капиталдин кьадар 639 431, 83 манат яз тайинарнава.
Эгер виликдай хизанди сертификатдин такьатрикай са кьадар ишлемишнаватIа, амай пай 3,7 процентдин артухарда.
Квез харж ийиз жеда?
Дидевилин капиталдин такьатар 5 хиле харж ийиз жеда: яшайишдин шартIар хъсанаруниз, аялар патал чирвилер къачудай къуллугърай гудай гьакъи яз, дидедин гележегдин пенсия патал, инвалид аялар обществода яшайишдин рекьяй адаптация авунин ва интеграциядин къуллугърай гудай пул яз, дарда авай ва 2018-йисан 1-январдилай инихъ кьвед лагьай аял хьанвай (хвавиле ва я рушвиле кьабулнавай) хизанар патал гьар вацра гудай пул яз.
«Лезги газет»
