Рафтарвилерин месэла

Россияди Вашингтондиз Барак Обамадин девирда башламишай дипломатвилин наразивилер тахьай мисал яз гьисабун теклифна. Идан гьакъиндай “Новости” РИА-диз РФ-дин МИД-дин кьил Сергей Лаврова ихтилатна.

Министрди къейд авурвал, эгер алакъаяр хъсан хьун анжах Москвадилай аслу тиртIа, баришугъвилин рафтарвилер фадлай арадал хтанвай.

Гуьруьшдиз гьазурвиликай

Украинадин президентдин офисдин кьил А.Ермака В.Зеленский РФ-дин регьбер В.Путинахъ галаз гуьруьшмиш хьунин гьазурвилерикай ихтилатна, хабар гузва ТАСС-ди. Ада малумарайвал, алай вахтунда гуьруьш кьиле фидай югъ ва чка веревирдзава. Ермакан фикирдалди, суьгьбетардай темайрикай сад Россиядин, Германиядин, Украинадин ва Франциядин саммитдин нетижаяр хьун мумкин я.

РикIел хкин, 20-апрелдиз В.Зеленскийди В.Путиназ Донбасс­дин дяве физвай са чкада гуьруьшмиш хьун теклифнай. Украина­дин гьукумдарри менфятлу гуьруьш кьиле финик умуд кутазва.

Хатасуз уьлкве

Коронавирусдин тIугъвалдин девирда виридалайни хатасуз уьлкве Сингапур яз гьисабзава. Идан гьакъиндай Америкадин “BIoomberg” агентстводин ахтармишунри шагьидвалзава.

Хатасузвилин жигьетдай идалай вилик сад лагьай чкадал хьайи ЦIийи Зеландия исятда кьвед лагьай чкадал ала. Къейдзавайвал, коронавирусдиз акси рапар ягъунин гьерекатар йигин еришралди кьиле физвайвиляй ва тIугъвалдихъ галаз таъсирлудаказ женг тухузвайвиляй гьалар рази жедайбур хьанва. Мягькем серенжемар себеб яз, гьар юкъуз начагъ жезвайбурун кьадар агъуз аватнава.

Ахтармишунрин серенжемда дуьньядин 53 уьлкведи иштиракнава, и жергеда Россия 22-чкадал ала. Алай вахтунда чи уьл­кведа 7,5 миллиондилай гзаф ксариз коронавирусдиз акси рапар янава.

Къимет гана

Россиядин оборонадин министр С.Шойгуди къейд авурвал, США-дин ва НАТО-дин гьерекатри Европада военный хаталувилер  артухарунал гъида. Идалайни гъейри, герексуз гьерекатри Украинада миллетбазвилин месэлаяр къизгъинарун мумкин я. Министрдин гафар ТАСС-ди раижнава.

Алава хъувурвал, Донбассда кьиле физвай яракьлу женгер РагъакIидай пата цIай кутазвай миллетбазвилин рафтарвилерин нетижа хьанва. С.Шойгуди тестикьарайвал, Россияди США-дин ва Альянсдин къурху кутазвай гьерекатар хъсандиз дикъетдик кутунва.

Индиядин чалпачух

Коронавирус чукIунин жигьетдай Индияда арадал атанвай гьалар лап татугайбур я, ина тIугъвал себеб яз кьенвайбурун кьадар 200 агъзурдав агакьзава.

“Би-би-си” чешмеди хабар гузвайвал, крематорийра чкаяр бес тежезвайвиляй мейитриз паркара, баябан чкайра цIай язава.  Уьлкведа ийир-тийир квахьунин, теспачавилин гьалар арадал атанва.

Индияда арадал атанвай гьалар коронавирусдин тарихда тахьай хьтинбур я: 27-апрелдиз ина 323 агъзур касдик коронавирус акатна. Премьер-министр Н.Модиди ихтилатайвал, уьлкведал коронавирусди гьужумнава.

Эхиримжи тагьким

Азербайжандин президент И.Алиева малумарайвал, мукьва­ра часпардал арадал атай гуьлле гунин агьвалат эхиримжиди хьун лазим я. Адан фикир “Новости” РИА-ди раижнава.

И.Алиеван гафаралди, Азербайжанди Эрменистандихъ галаз авай часпардал сергьятчийрин иштираквал аваз кьиле фейи къал кутунин агьвалатдиз фикир ганач ва сабурлувал хвена. Ада эхиримжи сеферда яз тагькимарзавайдакай лагьана.

Азербайжандин терефди къейдзавайвал, ихтилат физвай агьвалат гуя кьве уьлкведин часпардин мулкара 21-апрелдиз арадал атана.

Гьавадикай

Гьавадин шартIарикай виликамаз хабар гунин “Фобос” центра­дин кьилин пешекар Е.Тишковеца чимивилер алукьдай вахтуникай “Известия” чешмедиз хабар ганва. Адан гафаралди, Россияда майдин суваррин сад лагьай паюна гьаваяр къайибур, гар квай­бур жеда. 6-майдилай башламишна, гьаваяр яваш-яваш чими хъжеда. “Гъалибвилин юкъуз термометрди агъа кIан 15-20 градус­ къалурда. ЧIимелвал квачир, рагъ алай йикъар жеда”, — лагьана пешекарди.

Идалай вилик Гидрометцентрадин илимдин регьбер Р.Вильфандани Россияда майдин эвел кьилера гьаваяр къайи жеда лагьанай.

«Лезги газет»