Играми ватанэгьлияр! Рамазандин вацра газет кIелзавайбурун арада диндин конкурс тухудайдакай чна виликамаз хабар ганай. Къейд ийин хьи, “Лезги газетдин”­ редакцияди цIи и серенжем кьвед лагьай сеферда тешкилзава.

Лагьана кIанда, конкурс тухунин куьмекдалди чаз газет кIелзавайбурухъ диндин рекьяй авай чирвилер артухардай, инсаният патал Исламдихъ авай метлеб, кьетIенвал къалурдай, кIелзавайбурун ара­дай диндин дерин чирвилер авайбурун алакьунар къейддай ниятар ава.

Конкурсдин кьилин шартIарикай сад ам я хьи, ана Исламдин университетар, медресаяр акьалтIарнавайбуруз, кьилдин алимривай, имамривай чирвилер къачунвайбуруз иштиракдай ихтиярар авач. Вучиз лагьайтIа, абур хъсандиз диндин гъавурда ава ва конкурсдин суалриз абурувай са четинвални авачиз жавабар гуз же­да. И конкурс асул гьисабдай жемят, адетдин газет кIелзавайбур (чпихъ Исламдай имамрихъ, муаллимрихъ, алимрихъ хьтин чирвилер авачирбур) патал я. Яшарин жигьетдай тайин сергьятар авач, конкурсда жегьилривайни иштиракиз жеда, яшлубурувайни.

Конкурсдин суалриз жавабар гун патал­ 2 гьафте вахт тайинарзава, 6-майдалди. Анлай кьулухъ жавабар кьабул хъийи­дач. Иштиракчийривай чпин жавабар редакциядиз пуд жуьредикай менфят къачуна ра-къуриз жеда:

1) почтадин алакъадин отделенийрай (РД, Махачкала, пр-т Насрутдинова, 1 “А”, 7 этаж);

2) интернетдин куьмекдалди чи газетдин электронный почтадиз (адрес — Lezgigazet@yandex.ru);

3) ватцапдиз (телефондин нумра — 8989-653-42-35) рекье тваз жеда.

Гьим къулай ятIа, гьам хкягъа. Жабавар аваз рекье твазвай чарчин сифте кьиляй “Конкурсдиз” гаф кхьиз рикIелай алудмир.

Гъалибчияр пуд кас хкяда. КIвенкIвечи чкаяр кьурбуруз савкьатар гуда: 1-чка — телефон, 3 агъзур манат; 2-чка — сят, 2 агъзур манат; 3-чка — капI ийидай халича, 1 агъзур манат пул. Идалайни гъейри, абуруз дипломар ва лезги чIалал Ислам диндикай кхьенвай ктабар гуда.

Иштиракчияр патал мад са шартI ава: редакциядиз жавабар рекье твадайла, тIвар­ни фамилия, яшамиш жезвай чка (шегьер, район, хуьр) ва телефондин нумра къалурун чарасуз я.

Конкурсдин нетижаяр Рамазандин варз куьтягь хьайидалай кьулухъ кьада ва гъалибчийрин тIварар газетдай малумарда. КIвенкIвечи  чкаяр  кьурбурувай  савкьатар мус ва гьинай вахчуз жедатIа, чна абуруз, зенг авуна, хабар гуда. Кон­курс­дин кIвалах­риз баллрин куьмекдалди къимет гуда.

Къейд ийин хьи, “Лезги газетдин” редакцияди диндин конкурс гьар йисуз тухудайвал я. Идалайни гъейри, чахъ гуьгъуьнлай къведай йисара адан сергьятар мадни гегьеншардай ниятар ава: гъвечIи ва чIехи яшара авайбур патал кьилдин суалар гьазурда. Гъалибчиярни, цIи хьиз, 3 ваъ, 6 кас хкяда. Конкурсдин кьилин савкьат яз умрадиз ва я гьаждиз фидай путев­ка жеда.

ЦIинин йисан конкурс 20 суалдикай ибарат я. Къейд ийин хьи, абур 2020-йисан 19-нумрадилай инихъ “Лезги газетдин” чинриз акъатнавай диндин макъалайрин бинедаллаз гьазурнава. Жавабарни гьа макъалайрин куьмекдалди гана кIанзава. Маса чешмейрай къачуна гьазурнавай жавабар чна кьабулдач.

Суалар:

1. Ислам динда мукьва-кьиливилин алакъаяр хуьн тIалабзава. “Лезги газетдиз” акъа­тай макъалада а кар тестикьарзавай гьадис къалурнавай. А гьадис гьим ятIа, кхьихь.
2. Вичин къуни-къуншидиз гьуьрмет авун мусурманрин эдебрикай я. А кар субутзавай делил (гьадис) гъваш.
3. Гьадисда лагьанва (мана): “Чидани квез гъибет вуч ятIа?…”. Гьадис эхирдалди давамара.
4. Гьадисда лагьанва (мана): “Кьуд гьал ава — абур низ хас ятIа, ам халисан му­нафикь я…”. Гьадис эхирдалди давамара.
5. Инсанар кIватI хьайи чкадай (ижласдай, собранидай) къарагъдайла, кIелдай дуьа гьим я?
6. ТIуьна куьтягьайдалай кьулухъ жуван къаб ва тупIар пекиналди михьдалди ва я целди чуьхуьдалди вуч авун лазим я? И кардиз талукь делилни (гьадис) гъваш.
7. Сефердиз экъечIдайла, кIелдай дуьа гьим я?
8. Гьадисда лагьанва, (мана): “Вад шей бедендин сагъламвилиз талукь крарикай (серенжемрикай) я…”. Гьадис эхирдалди давамара.
9. Нянихъ ксудайла ва пакамахъ ахварай аватайла, кIелдай дуьаяр гьибур я?
10. Экуьнин ва нянин дуьайрикай (азкар ссабагь ва-ль-масаъ) пакамахъ кIелдай пуд дуьа (зикр) ва нянихъ кIелдай пуд дуьа кхьихь.
11. Хъсан ахлакьрин дережадин патахъай кьве делил гъваш: са аят ва са гьадис.
12. Гьадисда лагьанва (мана): “Саййиду-уль-истигъфари: Аллагьумма Анта Рабби…”. Гьадис эхирдалди давамара.
13. Гьадисда къалурнава: 70 агъзур кас чи уьмметдикай гьахъ-гьисаб галачиз Женнетдиз фида. Абур вужар я?
14. (Гьаялувиликай, ягьдикай рахазвай) гьадис эхирдалди давамара (мана): “Имандихъ пудкъанни цIудалай артух хилер ава…”.
15. Гьаждин кьилин дестек Арафадал акъвазун я. Арафадин йикъан сив хуьнин дережа субутзавай са делил (гьадис) гъваш.
16. Жуван кьенвай мусурманар тир мукьва-кьилийрин паталай гьаж ийидай ихтияр авайди субутзавай са делил (гьадис) гъваш.
17. Сив хуьнихъ хийирар ва сувабар гзаф ава. Абурукай вад кхьихь.
18. Чи Пайгъамбардин (къуй Аллагьдин патай салават ва саламар хьурай вичиз) асгьабар (Аллагь рази хьурай чпелай), пайгъамбаррилай гуьгъуьниз виридалайни хъсан ва диндар ксар яз гьисабзава. И кар субутзавай кьве делил кхьихь: сад Къуръандай ва сад гьадисрикай.
19. Вири асгьабрикай кьуд халифа виридалайни лайихлубур ва дережадиз чIехибур яз гьисабзава. Гьар са халифадин жигьетдай и делилар кхьихь: адан тIвар ва бубадин тIвар, ам халифа хьайи йисар, адан девирда хьайи зурба крарикай са кар.
20. Гьи халифадин девирда (гьи йисуз) Азербайжан ва Дербент Исламдиз ачухна (анрив Ислам агакьна)?

Чаз конкурсдин иштиракчийрихъ агалкьунар хьана кIанзава. Аллагь куьмек хьурай!

«Лезги газет»