Тахсиркарвилин кIватIал арадал гъунай ва алдатмишунин рекьелди бюджетдин 620 миллион манат пул чуьнуьхайвиляй Махачкъаладин Советский райондин суддин къарардалди Дагъустандин зегьметдин ва яшайишдин рекьяй вилик финин виликан министр Расул Ибрагьимов кьунва. Идан гьакъиндай Дагъустанда авай РФ-дин силисдин комитетдин силис тухудай управлениди ТАСС-диз киш юкъуз хабар гана.
Дагъустандин Верховный суддин пресс-къуллугъдин руководитель Зарема Мамаевади ТАСС-диз хабар гайивал, Ибрагьимов 27-майдалди (са вацрани 18 юкъуз) дустагъда тунва. З.Мамаевади алава хъувурвал, кьабулнавай къарардин гьакъиндай пуд йикъан вахтунда апелляциядин арза кхьидай ихтияр ава.
Расул Ибрагьимов 9-апрелдиз кьуна. Силисдин органрин малуматралди, Р.Ибрагьимова тахсиркаррин кIватIалдин иштиракчийрихъ галаз 2017-2018-йисара алдатмишунин рекьелди бюджетдин 620 миллион манат пул чуьнуьхна ва гьа идалди Дагъустан Республикадин бюджетдиз еке зиян гана. Чуьнуьхнавай бюджетдин пулар республикадин агьалийриз яшайишдин рекьяй къуллугъ авун патал чара авунвайбур тир. Пулар, агьалияр яшайишдин рекьяй къуллугъдай центрадин къуллугъчийрин кIвачихъ тапан документар туькIуьруналди, ведомствода кIвалахзавайбуруз лап виниз тир премияр гуналди, чуьнуьхна.
«Лезги газет»
