Играми мусурман стхаярни вахар!
Аллагьдин кьадардалди, чна мад сеферда берекатрив ацIанвай пак Рамазандин варз кьабулзава. Са шакни алачиз, им вич мусурман яз гьисабзавай гьар са инсан патал еке шадвал я, гьикI лагьайтIа, и вацрахъ чакай гьар сад патал чIехи метлеб ава.
Диндин ктабра къейднавайвал, Рамазандин вацра Аллагьди рикIин сидкьидай дуьа ийизвай мусурманрин гунагьрилай гъил къачузва. Хийирдин, къени, хъсан кIвалахрай гзаф кьадар сувабар кхьизва, пис кIвалахрай лагьайтIа, пара гунагьар. Гьавиляй чун и пак вацра ва адалай кьулухъни Аллагь рази жедай крарин иесияр жез алахъна кIанда.
Играми ватанэгьлияр! Къуй чаз Аллагьди Рамазандин вацра сивер хуьдай мумкинвал гурай ва гьар са мусурмандин сиверни садакьаяр Халикьди кьабулрай! Чун Аллагьдин регьимдик квайбурукай хьурай. Амин!
Рамазандин варз квез рикIин сидкьидай мубаракрай, азизбур!
«Лезги газет»
