6-апрелдиз Махачкъалада кьиле фейи коронавирусдин вилик пад кьунин жигьетдай кардик квай Оперштабдин нубатдин заседанидал РД-дин Роспотребнадзордин Управленидин кьил Николай Павлова хабар гайивал, Дагъустанда коронавирусдин инфекцияди арадал гъанвай Британиядин штамм (SARS-CoV-2 вирусдин штамм) акатнавай кьве дуьшуьш винел акъуднава.

И вирус акатнавайбур республикадиз къецепатан уьлквейрай хтанвай агьалияр тир. Кьведни сагъар хъувунва. Абурухъ галаз алакъада хьайи 26 кас духтуррин кьетIен гуьзчивилик ква.

Ихьтин вирусрин вилик пад кьун патал Н.Павлова къецепатан уьлквейрай республикадиз хквезвай гьар са кас ахтармишун патал я Махачкъаладин аэропортуна махсус кабинет ахъаюн, я и кар кьилдин са клиникадал тапшурмишун теклифна.

Играми ватанэгьлияр! ТIегъуьн алатнавач. Сагъламвал хуьн патал духтуррин меслятрал амал ая. Коронавирусдиз акси кьилин яракь адаз акси раб ягъун (вакцина) я. Ам квевай куьн яшамиш жезвай шегьердин, райондин духтурханайра ягъиз жеда.

«Лезги газет»